RIHA - 15 rey o ke bi îdiaya “heqaret kerda” derheqê Emîne Şenyşare de cipersayîş yeno destpêkerdiş.

 

Nobeta Edaletî ya Emîne Şenyaşar û lajê aye Ferît Şenyaşar (Keyeyê Şenyaşarî) seba 3 ferdê keyeyê înan hêrişê pawitox û merdimê Parlametnerê AKPyî Îbrahîm Halîl Yildiz ra amebî qetilkerdiş, dewam kena. Keye seba edalet bi ca bêro, 9ê Adara 2021ine ra verê Edliyeyê Rihayî de nobete gêno. Nobete kewte roja 541ine.

 

Derheqê Emîne Şenyaşar de bi îdiayê roja 529ine ê çalaki de “heqaret kerda” cipersayîş ame destpêkerdiş. Seba cipersayîşî keye serê siba, pêwa avûkatanê xo şi Mudûrîyê Polîsan ê Pirsûsî û reyke bîn îfade dayî. Emîne Şenyaşare Mudûrîyê Polîsan de heqê xo  yê nêqiseykerdişî xebitna.

 

Avûkatê keyeyî ra Nîhat Çîftçî dîyar kerd ke cipersayîş seba Nobeta Edaletî bidê vindarnayîş, ameyo destpêkerdiş û cipersayîşêkê bêqayde ameyo amadekerdiş. 

 

Keye dimayê îfade da, seba roja 541ine de Nobeta Edaletî bigîrê, verê xo dayî vere Edliyeyê Rihayî. 

 

'Ewlad û mêrdeyê aye ameyî qetilkerdiş’

 

Keyeyî serê hesabê xo yê Twitterî de wina vat: “Xirabîya tewr pîl ke bi dayîkêke rê bêro kerdiş, kiştişê ewladanê aye yo. Nêweşxane de di ewladê aye û mêrdeyê aye ameyî qetilkerdiş. Lajêkê aye 4 serrî yo bi tena sereye xo hucreyê zîndanî de yeno tepiştiş.  Derheqê dayîka ke nobeta edaletî gêna de zî cipersayîş yeno destpêkerdiş. Dayîke ewro zî emniyet de îfade dana.” 

 

Vernîya nika zî 14 cipersayîşî derheqê Emîne Şenyaşar de amebî destpêkerdiş. 5 cipersayîşî zî derheqê lajê ey Ferît Şenyaşarî de ameyê destpêkerdiş.