STENBOL – Endama Şubeyê Komîsyonê Ciwanan ê ÎHDyî yê Stenbolî, Karun Yildiz da zanayîş ke seba problemê ciwanan ci dir rî bi rî manenê, Komîsyonê Ciwanan ameyo deklerekerdiş û vat: "Hedefê ma oyo ke  ciwanî bêters heqê xo bipawê û pey rastîyê ci ra bawer kenê, şêrê.”

 

Seba bêkarî, ameyoxê nêdîyar, tengkerdişê wareyê azadîye ciwan verê xo bi Ewropa akenê. Îqtîdar vera polîtîkayê çareserî awan bikero, tena nêzdîyê weçînayîşê çend sozan danê. Bi taybetî bajaranê kurdan bi polîtîkayê şer yê taybetî verê ciwanan ver bi tîryakî bene. Rêxistinê ciwanan zî hemverê nê polîtîkayan bi zaneyî yenê kerdiş, têkoşînê xo kenê.

 

Seba çareserî game: Komîsyonê Ciwanan ê ÎHDyî 

 

Şubeyê Stenbolî yê Komeleya Heqê Merdiman (ÎHD) na çarçeweya 25ê Tebaxe de Komîsyonê Ciwanan deklere kerd û seba çareserîya probleman gamêke eşt. Endama ya Şubeyê Komîsyonê Ciwanan ê ÎHDyî yê Stenbolî, Karun Yildize seba çareserkerdişê problemê ciwanan înan komîsyon deklere kerdo û vat: “Ma waşt ma problemê nika rojeve de tewr zêde bidê mojnayîş. Ciwanî nêzanê do seba probleman şêrê ça. Coka ma waşt hetkarîya înan bikerê û ma komîsyon awan kerd.”

 

Ciwan xeylêk çî ra bêpar manenê

 

Karune da zanayîş ke goreyê dayeyê Sazgehê Îstatîstîkî ê Tirkîya (TUÎK), 84 mîlyon 680 hezar 2 sey û 73 kesî nê  welatî de ciwîyenê û nê ra sera 21.6 yê ciwanan o. Karune da zanayîş ke yeno texmînkerdiş, dayeyê  bêkarîye yê camêrdan sera 18.4 ê cinîyan zî sera 27.6 o. Karune wina vat: “Bi rastî cinî wareyê vînayîşê karî de zehmetî vînenê. Ciwanî cuya xo ra razî nêyê. Çike xo nêeşkenê bi resnê cayêk. Xo nêeşkenê biresnê huner, konser, pêşangeh, sînema û faliyetê komelî. Her çî zaf vay o. Bi taybetî ciwanê unîversîte wanenê tewr zêde zehmetî vînenê. No zî seba ciwanan pirsgirêkêk pîl o. Coka nêeşkenê cuya xo ya komelî zî biciwîyê.”

 

'Berê ma pêro ciwanan rê akerde yo’

 

Karune dewam de wina vat: "Nêwazenê ciwanî biwanê û bi musê. Çike ciwanê ke wanenê, eşkenê rexne bikerê. Îqtîdar nêwazeno ciwanî rexne bikerê. Labelê ma do nê derbaz bikerê û bi qiseykerdiş heqê xo bipawê. Wexto ke problem vejêno, ciwanî eşkenê bidê berê ma ro. Seba tercîhê unîversîta zî ciwanî eşkenê bidê berê ma ro.”

 

'Heta deste ma ra bêro ma do paştdayîş bidê ciwanan’

 

Karune tewr peyîn wina vat: “Ma do atolyeyê balantişî abikerê. Faliyetê hunerî û ramitişî bikerê. Sewbîna ma do şewanê sînema, semîner, arayîya ciwanan û çalakiyê winasî bêrê kerdiş. Ma do vernê de yewbînan nas bikerê, dima ra ÎHDyî nas bikerê. Hedefê ma oyo ke ciwanî nêtersê heqê xo biwazê. Embazê ke wazenê beşdarê komisyonî bibê zî eşkenê bêrê. Muracat gama ke bêrê kerdiş, ma eşkenê paştdayîşê huqûqî û psîkolojî zî bidê. Heta destê ma ra bêro ma do paştdayîş bidê ciwanan.”