MERKEZÊ XEBERAN - Merkezê xeberan ê MKGPyî, derheqê rojnamegerê ke vizêr wexto Wan de Mîtîngê 1ê Êlule taqîb kerdêne, hetê polîsan ra ameyî derbkerdiş û ameyî tehdîtkerdiş ser o eşkerayî dayî. MKGPyî eşkerayîya xo de waşt ke derheqê nê polîsan de cipersayîş bêro destpêkerdiş.

 

Rayberîya Partîya Demokratîke ya Şaran (HDP) vizêr Wan de bi wesîleya 1ê Êlule Roja Aştîye ya Dinya de mîtîng ame organîzekerdiş. Dimayê mîtîngî girseyî dest bi rayîr ra şîyayîşî kerd. Rojnamegerî zî waştî ke rayîr ra şîyayîş taqîb bikerê, muxabira ajansê ma Zelal Tunç  û Elfazî Toral û muxabira Ajansê Xeberanê Mezopotamyayî (MA) Bêrîvan Kutlu hetê polîsan ra ameyî tehdîtkerdiş û ameyî kuwayîş.  Platformê Cinîyan ê Mezopotamyayî (MGKP) bi eşkerayîyêke nuşte reaksîyon vera tehdîtkerdişê rojnamegeran û kuwayîşê înan yê hetê polîsan ra mojna.

 

'Ganî cipersayîş bêro destpêkerdiş’

 

Eşkerayî de bale antî serê tedayê polîsan, şîdetê serê rojnamegeran û wina ame vatiş: “Wan de 1ê Êlule de wexto ke xeberî ameyîne taqîbkerdiş, muxabira JINNEWSî  Zelal Tunç û Elfazî Toral û muxabira Ajansê Xeberan ê Mezopotamyayî (MA) Bêrîvan Kutlu hetê polîsan ra ameyî tehdîtkerdiş, çeke înan rê ameye antiş û bi kiştiş polîsan înan tehdîd kerd. Ganî nê şîdetî serê rojnamegeran ra wedarnê û derheqê polîsê ke hêrişê rojnamegeran kerdê zî cipersayîş bêro akerdiş.”