Rojda Aydin

 

ÊLIH - Zeynep Çelîka ke wareyê tekstîlî de xebityena dîyar kerd ke wareyêko tewr zêde kede yena werdiş a û vat: "Xebata ke mîyanê şert û mercê wina de tesîr serê pêro cuya ma de kena. Labelê eke cinî serê nameyê xo de qerar bide û heqê xo xwe bipawê, do bieşkê seba tutanê xo komelêko baş awan bikerê.”

 

Şert û mercê xebatê yê wareyê tekstîlî her wext rojeve de yo. Pêwa metrepolan nika xeylêk bajaran de tekstîl vila bîyo. Çend sey wareyê îstîhdamkerdişê yeno ercnayîş zî tewr zêde bîyo cayê kedwerdişî. Êlih de zî demê peyên de tekstîl zêde bîyo. Bi krîzê ekonomî û çinbîyayîşê karî dir xeylêk kesî verê xo danê nê cayan û mîyanê şert û mercê tewr nêbaş de bi heqdestêk kêm xebityenê û taybetî zî cinî.

 

Yew nê cinîyan ra zî Zeynep Çelîka ke 30 serrî ya û wareyê tekstîl de xebityena, ajansê ma rê qalê karê tekstîlî kerd.

 

Wareyê tekstîlî de keda cinîyan yena werdiş

 

Zeynepe, dîyar kerd ke Tirkîya de her ware de keda cinîyan yena werdiş û yena çinkerdiş û vat: “Nê wareyan ra yew zî wareyê tekstîlî yo. Ez zî bi xo uca de xebityena û keda ma uca de yena werdiş. Cinîyê ke ewro tekstîlan de xebityenê, seba karêke înan çin o û wendişê înan çin o, tekstîl tercih kenê. Êlih de zî demê peyin de hûmara  tekstîlan zêde bîyo. Sewbîna wayîrê tekstîl û fîrmayan seba qezencî hêzê karî yê tewr erjan tercih kenê. Her di het ra cinî mexdûr benê. Keda cinîyan hem keye de û hem zî wareyê tekstîl de nêna vînayîş. Bi her hawa kedwerdişêkê pîl esto. Labelê her tim seba xebata tekstîlî, cinî yenê tercîhkerdiş."

 

‘Êdî quwetê ma nêmaneno ke ma çîyêk bîn bikerê’

 

Zeynepe vat, aye tekstîl de serê masa de xebityena û vat: “Tekstîl cayêk rehet nêyo. Cinî nêzdîyê 9 saetan xebityenê û reyna zî mesaî rê manenê. Têkiliyê tîya hetê asayîşî de nêyê. Hemverê hende keda ke ma danê pereyêko baş nêreseno ma. Wextê ma pêroyî tîya de derbaz beno. Êdî quwetê ma nêmaneno ke ma çîyêk bîn bikerê.  Ma seba xo êdî çîyêk bîn nêkenê.”

 

‘Demê dîyarkerde de şinê tuwalet’

 

Zeynepe dewam de wina qal kerd: “Kar de hemverê cinîyan vengê xo berz kenê. Demo ke hûmare kêmî bo, hêrsê xo xebatkarê bînan de vejenê. Demo ke goreyê waştişê înan kar nêro kerdiş, vanê bi heqê xo kar nêkerdê. Demê ke ameyê dîyarkerdiş de cinî şinê tuwalet. Heme cayen de eynî çî esto. Bi temamî hemverê kedkaran de mobîng esto. Her tim karêk tewr zêde yeno waştiş. Demo ke qîrenê ti nêeşkena veng bikerê. Sewbîna ti nêeşkena heqê xo bigeyrê û muracatê cayêk bikerê. Hiyerarşiyêkê esto û midûr, hetkarê midûrî û sewbîna. Sewbîna tedaya psîkolojîkî zî zaf zêde ya."

 

'Taciz sey heskerdiş yeno vînayîş’

 

Zeynepe bale ant serê tacîzî û vat: "Tena hemverê cinîyan de ney, pêro xebetkaran de heqaret yeno kerdiş. Hetê fîzîkî de zî temas xeylêk zêde yo. Keso ke wezîfeyê ey to ra berzêr bo, heqê temaskerdişî xo de vîneno û no zî yeno manaya tacîzî. La demo ke cinî ferq de nêbo, nê sey taciz nêvînena. Kêmasîyêkê ma yê komelî esto, ganî ma bimojnê xêrcê waştişê to tu kes nêeşkeno dest bido to. Ganî cinî no het ra hişyar bê. Demo ke nê çî hetê kesê ke serê ma de yê yeno kerdiş, sey tacîz ney, sey heskerdiş yeno vînayîş. No çî zî xeylêk şaş o.”

 

'Wa serê nameyê xo de qerar bidê' 

 

Zeynepe tewr peyin wina veng da cinîyan: "Tekstîl de demo ke ez nê çî vînena, raştî zî bêzar bena.  Tu kes nê çî sey kedwerdişî nêvîneno. Bingehê nê de keye esto. Sere de keda cinî yena werdiş û keda aye deste aye ra yena giewtiş. Ma roje de 9 saetan şixulênê û reyan zî seba mesaiyi manenê. Ez wazena ke wa cinî bizanê, wa rayîr nêdê  mêrde, pî, bira û waşteyê xo, wa heqê xo bipawê. Wa serê nameyê xo de qeraran bidê. Seba xo û tutanê xo komelêk baş awan bikerê.”