Sema Çaglak

 

ŞIRNEX - Sîyasetmedarê cinîyan ê Şirnexî reaksîyon vera tepiştişê parlementera HDPyî ya Amedî Semra Guzele dayî û dîyar kerdî ke hemverê temsîlkarîya cinîyan bêtehamulîyêk pîl esto û dîyar kerdî ke ê hêrişê hemverê Semraye şermezar kenê û vatî: "Semra Guzele îradeyê cinîyan û Şarê Kurdî ya.”

 

Parlamentera HDPyî ya Amedî Semra Guzele ke destnêdayişê aye ame wedaritiş û hetê dozgerîya komare ya Anqarayî ra cipersayîş aye rê amebi akerdiş 2ê êlule de Stenbol de ameye destbendkerdiş. Semra gama ke ameye destbendkerdiş bi şîdet û îşkence reyde rî bir î mende. Reaksîyonê hemverê tepiştişê Semra Guzele her ke şino tewr zêde beno. Cinîyê sîyasetmedarî reaksîyon vera tepiştişê Semra Guzele dayî.

 

Hemşaredara HDPyî ya Silopî Adalet Fîdane, dîyar kerd ke sîyasetê kurdî de hedefgirewtişê cinî her rey xo bi metodêke bîn mojneno û wina vat: “Ê fotografê ke seba betalkerdişê parlementerî û tepiştişê Semra Guzele sey sebeb ameyî mojnayîş, serdemê prosesê çareserî de ameyê antiş û dimayê çend serran ameyê vînayîş. La heta nika nêamebî weşanayîş. Înan ê fotografan seba berjewendiyê xo şixulnayî û Semra hedef girewtî. Hemverê sîyasetê kurdî û siyasetmedarê cinîyan de bêtehamulîyêk esto. Partîyanê sîyasî yê ke tewr zêde cinî ci de ca gênê, partiye kurdî yê. Bi hêrişê Semraye dir, temsîlkarîyê cinîyê kurdî hedef ame girewtiş. Îqtîdar cinîyan xo rê sey tehluke vîneno û hedef gêno. No pêro cayan de wina yo. Cinî seba aştî û cuyêka têduşte têkoşîn kenê. Coka têkoşînê cinî yê na babetan hetê fehmê yewperestî de nêno hazimkerdiş.”  

 

‘Şarê Kurdî sereyê xo nêtewêna’

 

Adalete, dewam de wina qal kerd: “Kurdan seba xo Semraye temsîlkar weçînaya û raya dayê. Muameleyê ke hemverê Semra Guzele de ameyo kerdiş, şexsê Semra de pêro şarî rê ameyo kerdiş. Heta ewro şarê aştîwaştoxî hemverê nê zîhnîyetî sere nêtewênayê û xo ver daye. Têkoşînê Semra Guzele zî dîyar bi ke Şarê Kurdî ne bi hêrişan, ne kiştiş ne zî talankerdişî sereyê xo nêtewêna û têkoşînê xo dewam kenê.”

 

‘Cayê Semra Guzele meclîs o zîndan nêyo’

 

Hemsereka Şaredariya Hezexî ke vera ci qeyûm ame tayînkirin Songul Erdene zî vat: “Bi çend aşmî yo ke Semra hedef amebî girewtiş. Cinîyanê kurdan ra yeno ferzkerdiş ke vengê xo nêvejê û şarê Kurdî înan îrade nêmojneno ra. Semra Guzele hetê şaran ra ameya weçînayîş û temsîlkarîya îradeyî kena. Demo ke amebî tepiştiş zî Semra Guzele rastê muameleyêkê bêhuqûqî ameye. Ma nê nêzdîbîyayîşî şermezar kenê. Gama waştî serê Semra Guzele bitewênê, şexsê aye de waştî ke pêro cinîyê kurdî bitewênê. La Semra Guzele reaksîyonê xo mojna û nêverda ke sereyê aye bitewênê. Cayê Semra Guzele meclis o, zîndan nêyo. Nê hêrişê wehşî tena cinîyê kurdî rê yeno kerdiş. Qanûn û huqûqê Tirkîya seba Şarê Kurdî derbaz nêbeno. Yê ke komel de tewr zêde têkoşîn danê zî cinîyê kurdî yê. Coka îqtîdar cinîyê  kurdî xo rê keno hedef û wazeno siyaset û rojeve ra dûr bifîno.”

 

‘Ma peyser game nêerzenê’

 

Songule tewr peyîn wina vat: “Ma amancê hêrişê îqtîdarî ra hayîdar ê. Bi şerê taybetî û averşîyaye hemverê ma de hêrişê xidaran kenê. La ma do rayîr nêdê nê dişmînî. Şarê kurdî hemverê nê zulmî de sereyê xo nêtewênenê û têkoşînê xo tewr berz kenê. Ewro ra tepya zî Şarê Kurdî hemverê zilm û zordestî serê xo nêtewêneno û do têkoşînê xo bi rêxistin bikero. Ma bêhuqûqîyê hemverê Semra Guzele qebûl nêkenê reyke bîn veng danê Semra Guzele îradeyê cinîyan û şarê Kurdî ya. Ma tu wext peyser game nêerzenê û bi taybetî cinîyê kurdî do rayberîya nê têkoşînî bikerê.”