RIHA - Çalakîya Nobeta Edaletî ya keyeyê Şenyaşarî roja 559ine de zî dewam kerd. Keyeyî diyar kerd ke eke welat de kesê qanûnan aciz bibê, nê welatî de dozgerî bêfeyde benê.

 

Merdim û pawitoxê parlamenterê AKPyî Îbrahîm Halîl Yildiz ke 14ê hezîrana serra 2018ine de qezaya Pirsûsî ya Rihayî de hêrişê dikanê keyeyê Şenyaşarî kerd. Netîceyê hêrişî de mêrde û di lajê Emîne Şenyaşare ameyî qetilkerdiş. Emîne Şenyaşar û lajê xo Ferît Şenyaşar seba kiştoxî bêrê tepiştiş û muhakemekerdiş, 9ê adara serra 2021ine de vernîya Edliyeyê Rihayî de dest bi Nobeta Edaletî kerdî. Çalakiya keyeyî roja 559ine de dewam kerd. Seba ke edliye rojê betlaneyî de nêna akerdiş, keye nobete xo banê xo yê Pirsûsî de dewam kerd.

 

Keye derheqê babete de serê hesabê xo yê medyaya dîjîtalî de nê pare kerd: “Eke welat de kesê qanûnan aciz bibê, o wext dozgerî bêfeyde benê. Merdimî nika bêfeyde yê, ma xo sepernenê edaletê Homayî. Waştişê ma seba kesê persê ma eşkenê seba şima se bikerê, oyo ke seba ma dua bikerê.”