ANQARA - Derheqê hêrişê polîsê Îranî yê hemverê çalakîyê protestoyî yê seba qetilkerdişê Mahsa Amînî de yenê kerdiş de Rêxistinê heqê merdiman ê Hengawî raporêkê amade kerd û dayî zanayîş ke hêrişan de 38 kesî birîndar bî û 13 kesî zî ameyî tepiştiş.

 

Cinîya ciwan a kurde Mahsa (Jîna) Amînî Tehran de bi bahaneye ke porê aye aseno, hetê polîsanê exlaqî yê rejîmî ra ameye derbkerdiş û qetilkerdiş. Bi kiştişê Amînî dir rojhelatê Kurdistanî û xeylêk bajarê Îranî de çalakîyê protestoyî ameyî kerdiş û nê çalakîyî hema zî dewam kenê. Rêxistinê heqê merdiman ê Hengawî, derheqê hêrişê çalakîyanê protestoyî de raporêkê amade kerd. Rapor de ame dîyarkerdiş ke hêzê taybetî yê Îranî Seqiz û Sanandajî de hêrişê çalakîkeran kerd û tewr tay 38 kesî birîndar kerdî û 13 kesî zî destbend kerdî.

 

Rapor de yeno dîyarkerdiş ke netîceyê hêrişê hêzê taybetî yê rejîmî yê çalakîyê roja yewşemî de 33 kesî birîndar bî û birîndaran ra  rewşa 5 kesan giran a û nika nêweşxaneyê Tebrîzî yenê dermankerdiş. Sewbîna rapor de ame dîyarkerdiş ke guleyê plastîkî çime Persa Sehata 23 serrî, Nêçîrvan Marufo 18 serre û Kîan Derakşan kewto û nika yenê dermankerdiş.

 

Bi dewamî ame vatiş ke 14 kesî vizêr çalakîyê Seqizî de birîndar bîyê, wedarnayê Nêweşxaneyê Shafayî û pêwa birîndarîyê xo zî rastê tacîzê hêzê asayîşî ameyê. Sewbîna ame neqlkerdiş ke teda nêweşxaneyan de yeno kerdiş ke hûmara birîndaran û rewşa înan ê weşîye de agahiyan pare nêkerê.

 

Goreyê raporê nêweşxaneyê ke Hengaw de bi dest kerde, çalakîyê Sanandajî de 3 kesî bi çeka cifte yê polîsan birîndar bî û yew ci ra 14 serre 2 kênayê ciwan zî bi copan ameyî derbkerdiş. Goreyê agahîyê hetê Hengawî ra ameyê girewtiş; Sanandaj de heta nika 8 kesî hetê hêzê asayîşî ra ameyê tepiştiş. Kesê ke ameyê tepiştiş, nameyê çend kesan nê yê: “Arîan Majîdzadeh (17), Mîdîa Rahîmî (17), Ahwan Houshmand, Kamyar Heydari û Bahram Dîdar.”

 

Eynî wextî de Hengawî da zanayîş ke hêzê asayîşî bajarê Sanandaj û Seqizî serê telefon de xeylêk aktîvîstanê kurdan gêrenê, tacîz kenê û tehdîdê tepiştişî kenê. Rapor de ame vatiş; nê kesan ra yeno vatiş ke tewrê çalakiyan mebê û serê medyaya komelî zî derheqê grevê pêroyî yê seba merdişê Amînî de do eyaletê Kurdistanî de bêro organîzekerdiş, pare nêkerê.

 

Partiyê kurdî yê rojhelatê Kurdistanî bi wesîleyê protestokerdişê qetilkerdişê Mahsa Amînî hetê hêzê asayîşî yê rejîmê Îranî ra veng dabî ke 19ê Êlule de grevê pêroyî bêro destpêkerdiş.