MERKEZÊ XEBERAN - Paytextê Îtalya Roma de seba azadîya Rayberê PKKyî Abdullah Ocalanî hetê dezgehanê kurdan û îtalyanan ra konserêko pîl ame serûberkerdene.

 

Paytextê Îtalya Roma de seba azadîya Rayberê PKKyî Abdullah Ocalanî hetê dezgehanê kurdan û îtalyanan ra konserêko pîl ame serûberkerdene.

 

Konser hetê Komîteya Ocalanî rê Azadîye, Rete Kurdistan, Buroyê Enformasyonî yê Kurdîstanî û Merkezê Kulturî yê Araratî ra roja yewşemeyî bi şîarê 'Wextê Hêvîye û Abdullah Ocalanî rê Azadîye' ame dayene.

 

Xeylêk hunermendî tewrê konserî bîyî. Şaredarê Roma Amedeo Ciaccherîyî konser de qisey kerd, têkoşînê kurdan selam kerd û seba azadîya Ocalanî veng da.

 

Aktîrîsta namdare Anna Favella zî pawitişanê Ocalanî ra tay beşî wendî. Babîyê şehîdê YPGyî Lorenza Forserettiyî zî îfade kerd ke lajê ci seba dinyayêka bîne têkoşîn kerd.

 

Konser de hunermendan Zero Calcare, Jacomo hunerê xo pêşkêş kerdî.

 

Kaykerdoxê wayîrê Oscarî Elio Germanoyî derheqê têkoşînê kurdan û Ocalanî ser o pasajî wendî.

 

Hunermendan Hani Mojtahedy & the Moonî sehne de eleqeyêko pîl dî.

 

Konser de Fiorella Mannoia, Punkreas, The Andre zî vejîyayî sehne ser. Peynîya konserî de organîzatoranê konserî waşt ke wa Rayberê PKKyî Abdullah Ocalan cade bêro veradayene.