AMED - Zarok Ma, bi sloganê ‘keyeyê ma yê diyîn’ xebatê xo keno, hedefê înan oyo ke polîtîkayê asîmîlasyonî yê serê tutan û ciwanan wedarnê. Perwerdekara Zarok Mayî Evîndar Duleke vat, merdim ziwan, kultur, tarîxê xo keyeyê xo de musnenê û venga pîlkerdişê Zarok Mayî kerd.

 

2010ine de bi paştdayîşê şaredarîya bajarê Girdî ya Konservatuarê Aram Tîgranî ame awankerdiş û teşrîna peyêne 2016ine de qeyûm ame tayînkerdiş. Dima ra mamosteyê ci şaredariya xoser akademîya Ma Muzîkî awan kerd. 3yê Adara 2017ine de ame awankerdiş û heta nika xebatê xo kerd. 6ê Temmuza 2021ine de zî seba tutanê mabêne 0-5ine de Akademiya Zarok Ma awan kerd.

 

Sinifê ci 6 kesî bi ca yenê û keyeyî zî eşkenê tewrê nê dersan bibê. Bi sloganê ‘Keyeyê şima yê diyîn’ do babetê muzîk, kultur û ziwanî de perwerde seba tutan û keyeyan yeno dayîş. Perwerdekara Ma Muzîkî Evîndar Duleke derheqê babete de qisey kerd.

 

Tutî tîya esas erzenê

 

Evîndare wina vat: “Tutî cade bi akademî dest bi perwerdeyî kenê û no kêmî yo. Demo ma  Ma Muzik akerd, ma bi akademîya tutan û perwerde dest pêkerd û ma kêmîyêkê hîs kerd. Tutî, bi akademî dest pê kerdêne la vernîya nê de perwerdeyêkê çin bi. Ma zî waşt esas bierzê. Ma tutê mabêne 0-5ine de Zarok Ma perwerde kerd û dima ra akademî de bi ca kerd.”

 

‘Sîstemêkê ke tutan asîmîle keno esto’

 

Evîndare wina vat: “Zarok Ma hemverê nê polîtîkayan gamêk girîng bi. Her kes zano ke tutê Kurdî mektebî û her wareyê cuye bi tesîr benê. Hem hetê kultur, hem hetê ziwan de yenê asîmîlekerdiş. Ganî ma hemverê asîmîlasyonî de pawitişî de bê. Sebebê awankerdişê akademîya cinîyan zî no bî. Ma her tim vanê ganî vatişê akademî asan nêro vînayîş. Ma hemverê asîmîlasyonî xoverdayîşêk pîl danê. No şerêkê taybet o. Ma waşt ke ma tutan babeta ziwan-kultur-hunerî de xurt bikerê. Akademî no het de gamêka xurt a.”

 

‘Merdimî kultur û ziwanî keyeyê xo de musnenê’

 

Evîndare dewam de wina qal kerd: “Her kes sloganê ma zano. ‘Keyeyê şima yê diyîn’' merdimi ziwan, kultur û tarîxê xo keyeyê xo de musenê. Merdimî her çî keyeyê xo de vînenê û wina pîl benê. Ma waşt ke ma Zarok Ma bikerê cayêkê wina. Seba nê ma girîngî danê sloganê xo.”

 

‘8 hewteyan de mezûn bî û kewtî Ma Muzîk’

 

Evîndare qalê mezûnbîyayîşî kerd û vat: “Serra ma xeylêk baş derbaz bî. Serra vîyarte de nêzdîyê 725 wendekarî qeyd kerd. Yê dewam kenê zî bî, yê qeyd kerdî û nêameyî zî estbî. Yê ke qedênabî zî estbî. Ma serrêke wina derbaz kerd. Man ika kewenê demêkê newe. Yê serra vîyarte de kewtî sewîyeya diyîn. Tutê mezûn bîyê estê. Tutê 8 hewteyan de qedênayî û kewtî Ma Muzîkî. Tîya zî hîn tutî qij bî, hîn esasê înan goreyê akademîye bî. La seba akademî teşwîqkerdiş girîng bi. Hem keyeyan, hem zî tutan tîya de perwerde dî. Hînî kewtî qursan. Hîn kewtî akademî. Nika 300 wendekarî estê. Nêzdîyê 200 zî qeydê neweyî estê.”

 

‘Planê ma serrêke nêyê’

 

Evîndare wina qedêna: “Hêvîya ma dewamkerdişê plananê ma yo. Planê ma serrêke nêyê, ê çend serran ê. Ma wazenê n tutî akademî de xo biresnê. Ma her tim vanê, ma pey sloganê xo de yê. Keyeyî tersenê, seba tutanê xo mîyanê qesawetî de yê. Çi heyf teber de hetê kultur û ziwanî de şerêkê pîl esto. Ma wazenê ke keyeyî nêtersê. Wa tim tutanê xo reyde Kurdkî qisey bikerê.”