COLEMÊRG - Tepişteyo bi nameyê Dilhaz Kiliçoglu 5 serrî yo zîndanê Tîpê Tyê Ereglî yê Kocaeliyî de tepişte yo û nê prosesî de qet keyeyê xo nêdîyo. Dayika ey Zahîde Kiliçoglu da zanayîş ke a wazena reyke bo zî lajê xo bivîno.

 

Qezaya Geverî ya Colemêrgî de serra 2016ine de demê qedexeyê vejîyayîşê teberî de Dilhaz Kiliçoglu ame destbendkerdiş û tepiştiş. Dimayê nê cezaya muebetî ci rê ameye birnayîş û 7 serrî yo tepişte yo. Dilhaz 2 serran Wan de tepişte maneno û dima ra bi îdiayê gardiyan kuyayo, surgunê Zîndanê Tîpê T yê Ereglî yê Konyayî ame kerdiş. Dilhaz ke 5 serrî yo, keye ra dûrî yo, nê prosesî de bi keyeyî xo dir ne pêvînayîşê girewte ne zî akerde kerd. Dilhazî eynî wextî de na aşmêke yo zî hucre de yeno tepiştiş.

 

Dayika ey Zahîde Kiliçolgu derheqê rewşa lajê xo û tedayê zîndanî de qisey kerd.

 

Şertê zîndanî

 

Zahîde vat, seba lajê ci qawişe de radyo xebitnayo, cezaya hucreyî ci rê dayê û wina vat: “Pêwa lajê mi waştişname da zî hema bêsûc hucre de yeno tepiştiş. Ma pêro şertê zîndanan vînenê. Lajê mi hucre de baş wayîr nêbeno. Çiqas vajo ez baş a zî ma zanê ke qet baş nêyo. Seba ke nêwazeno ez xemgîn bibî, vano ez baş a.”

 

‘Ez tersana ke çîyêkê bêro sereyê lajê mi’

 

Zahîde vat, seba zîndan dûr o, 5 serrî yo lajê xo nêvînaya û vat, asayîşê ganê lajê xo ra bi qesawet a. Zahîde wina qal kerd: “Ez tersena ke çîyêkê bêro sereyê lajê mi. Ma nêeşkenê şêrê bivînê. Îmkanê ma yê ekonomî çin o. Wa Homa no zilmî qebûl nêkero. Tena lajêkê mi xebityeno. Ma nê pereyî zî şawenê zîndan.”

 

‘Ez wazena lajê xo bivînî’

 

Zahîde veng da wa lajê mi hucre ra vejê û vat: “Wa lajê mi bîyarê cayêkê nêzdî. Xora tepişte yo. Berdê cayêkê dûrî. No hem seba ey hem seba ma baş nêyo. Bêsebeb hucre de tepişnenê. Ma wazenê hucre ra vejê. Seba ke lajê xo nêvînena, xeylêk nêweşîyê mi virazyayî. Ez wazena lajê xo bivînî.”