MERKEZÊ XEBERAN - Bi qetilkerdişê cinîya ciwana kurde Jîna Mahsa Amînî reyde, xeylêk bajaranê Îranî de çalakî amebî destpêkerdiş. Netîceyê çalakiyan de welatijo bi nameyê Fûad Ghadîmî bi giranî birîndar bibi, serê siba dinyaya xo bedelnaye. Heta nika çalakîyan de 6 welatijî ameyê qetilkerdiş.

 

Cinîya ciwana kurde Jîna Mahsa Amînî, Tehran de bi sebebê ke porê aye aseno, hetê “polîsê exlaqî” yê rejîmê Îranî ra bi îşkence amebî qetilkerdiş. Bi qetilkerdişê Amînî dir sere de bajarê rojhelatê Kurdistanî, xeylêk cayê Îranî de çalakî ameyî kerdiş û hema zî dewam kenê.

 

Bajarê Dîvandareyî de netîceyê hêrişê çekdarî yê hêzê rejîmî de, çalakîker Fûad Ghadîmî bi giranî birîndar bibi. Ame zanayîş ke Fûad saetê serê sibayî de dinyaya xo bedelnayo. Goreyê Hengaw’ê; Fûad Ghadîmî bi 3 rojî bi Nêweşxaneyê Kausarî de koma de bi.

 

Sewbîna goreyê dayeyê peynî yê Hengawî; netîceyê hêrişê rejîmê Îranî de heta nika tewr tay 6 welatijî ameyê qetilkerdiş.