COLEMÊRG - Mehdî Mihçi ke Stenbol de ame destbendkerdiş, 4 rojan îşkence dî. Dayîka ey Gulbeyaza Mihçi da zanayîş ke zîndanan de edalet çin o û îşkence esto.

 

Stenbol de Mehdî Miçhi ke Gever de 7ê Tebaxe de ame destbendkerdiş û berdî Emniyetê Stenbolî. Mehdî 4 rojan îşkenceyo giran dî. Destbendkerdişî de bi tehdîdê mergî ame tehdîdkerdiş û seba îşkenceyo giran yê destbendkerdişî de kewt grevê vêşanîye yê bêdem. Mehdî dimayê îfadeyê dozgerî dima hetê 20ine  Dadgerîya Cezaya Sulhî ya Stenbolî de bi îdiayê ‘endamîya rêxistine’ ame tepiştiş û şawitî zîndanê Sîlîvrî. Dayika Mehdî Gulbeyaz Mihçi derheqê îşkenceyê lajê ci rê ameyo kerdiş û binpaykerdişê heqan ê zîndanan de qisey kerd.

 

‘Edalet çin o îşkence esto’

 

Gulbeyaze vat, îşkence lajê aye Mehdî rê ameyo kerdiş, caardişêkê bêmerdimayî yo û vat: “Demo ke ez şîya mi lajê xo dî, mi nas nêkerd. Wina îşkence ci rê kerdibî, goşêke ey rê veng nêşîne. Demêkê derg bi nêeşkayîne serê lingan de vindero. Vatişê, ‘her ca de edalet esto, zîndanan de îşkence çin o’ zûrî yo. Zîndanan de edalet çin o, îşkence esto.”

 

‘Ez asayîşê lajê xo ra bi qesawet a’

 

Gulbeyaze wina qedêna: “Tena lajê mi ney, heme kesê ke yenê destbendkerdiş, îşkence înan rê yeno kerdiş. Heqê weşîye yê Mehdî zî yeno binpaykerdiş. Goşêkê ey veng nêşino ci. Seba şêro doktor, waştişname dano la ey nêberdî nêweşxane. Lajê mi hema hucre de yo. Demo ke ame destbendkerdiş, tehdîd kerdî. Vatî, ‘Ti qisey nêkerê ma do to û keyeyê to kişenê.’ Ez asayîşê ey ra biqesawet a. Çend tepişteyî hucreyan de merdî. Ma pêro bî şahid.”