Melîke Aydin

 

MUGLA - Seba wareyê xozaya ke Sînpaşî Marmarîs de qetil kerdibi, netîceyê têkoşînê avûkatê cuye de do kombîyayîşê ÇEDî bêro kerdiş. Endama Komîsyonê Ekolojî yê HDPyî Beyza Ustun da zanayîş ke hem şaredarî hem zî wezaret înşatî nêdayîye yeno û vat, hem îqtîdar, hem zî masaya 6ine Sînpaşî paweno.

 

Taxa Îçmelerî ya qezaya Marmarîsî ya Muglayî nêzdîyê Kixilbukî hetê Sînpaş GYO A.Şî ra înşatê otele yeno viraştiş û pêwa qerarê ‘lazimî bi raporê ÇEDî çin o’ hetê 3ine Dadgeha Îdarî ya Muglayî ra ameye betalkerdiş û pêwa nê înşaat dewam keno. Hemverê qerarê betalkerdişê qerarê îtîrazî Dadgeha Berzî yeno kerdiş zî hemverê pawitoxê heqê cuye netîce bîyo û pêwa nê wareyê înşaatî yê aydê Parka Neteweyî yo, şîyayîşê welatijan hetê hêzê asayîşî ra yeno astengkerdiş. Weqfê Derûdorî yê Muglayî ke girêdayeyê Walîyê Muglayî (MUÇEV) 27ê Êlule de wareyê Muxtarîyê Karasogutî de do kombîyayîşê şarî bêro kerdiş.

 

Xoverdayoxê Sînpaşî ra endama Heyetê îdarekarîya Konseyê Bajarî ya Marmarîsî Halîme Şaman û Endama Komîsyonê Ekolojî ya HDPyî Beyza Ustun derheqê babete de ercnayîş kerd.

 

Halîme da zanayîş ke înşaat verê çimanê selahîyetdaran de bi hawayêkê bêqanûnî dewam keno û vat: “Rewşa bîyaye de vanê; ‘Parko Neteweyî girîng nêyo, tîya erdê min o, ez bi tapu eşkena seba karê tîya bikerî awanî. Amancê mi kar o, xozaya parkê netewî çin bibo zî xemê mi nêyo.’ Nê zî bi cesaretê selahîyetdaran anê ziwan. Seba wezaretê berpirsîyar Sînpaşî ra vano ke, ‘Verê bi dosya projeyi ame, to soz da ma, m abi to bawer ê, ma qerarê hewce bi ÇEDî çin o da la to wexto ke înşaat viraşt, to sozê xo nêgirewt, bi qerarê dadgehe rijyayîşêkê ekolojîk bi ca ame. Seba nê zî bawerî bi nê çin o. ‘La netîceyê ke selahîyetdarî wezîfeyê xo bi ca nêardî, ma kewtî prosesê newe yê ÇEDî.”

 

Halîme tewr peyîn qiseykerdişê xo de vat, do heta peynî nê qirkerdişê ekolojîk, bi selahîyetdaran dir danê eşnawitiş.

 

‘Wezaret zî şaredarî zî nêvînaye yeno’

 

Beyza Ustuna HDPyî zî da zanayîş ke wareyêkê statuyê Parka Netewî yo, yeno talankerdiş û vat: “Bi hîrayîya rayîrê Mugla-Marmarîsî de rayîrê ameyê akerdiş. Dimayê şewatê daristanan ware hîra bi. Game bi game; seba beşê diyarkerde yê înşaatî ruhsat gênê. ÇED eşkeno qeraro pozîtîf bido. Şaredariyê CHPyî dem bi dem betalî ra qerarê pozîtîf yê ÇEDî dimayê qerarê daniştayî ruhsat da. Vernê de red kerdêne, la dima ra zana ke vanê, ‘Ma mecbûr ê xora do ruhsat bêro dayîş.’ Yanî tîya polîtîkaya çinkerdişî esta. Pêwa nê nêvînaye yenê.”

 

‘Masaya 6ine zî hemkar a’

 

Beyza vat, masaya 6ine zî qirkerdişê xozaya ya Sînpaşî de hemkar a û vat: “Ma vajê ke AKP-MHP îqtîdar vînî keno. Şima vînenê ke tifaqî tîya ra tepya se kenê. Seba nê pêro merdime ke herême de ciwîyenê, kesê têkoşînê cuye dane û ma partî verê azadiya cuye de yê. Ma do hetê texrîbatê sermaye nêbê. Seba vindarnayîşê înşatî ma verê rêxistinê ke têkoşîn kenê bê. Çi destê ma ra bêro ma do bikerê.”

 

‘Dewlete hetê sermaye ya’

 

Beyza wina qedêna: “Hêzê dewlete hemverê têkoşînê şarî yê. Sermaye pawenê. Ma nê Cerattepe û Îkîzdere de zî dî. Qeymeqam û walî hetê şîrketan de yê. Wezîfeyê înan bîyo temsîlkarîyê îqtîdarî. Bi hemkarîya paştdayîşê sermaye kenê. Man ê xeylêk cayan de dîyo.”