Sema Çaglak

 

ŞIRNEX – Cinîyê Şirnexijî ke kiştişê Mahsa Jîna Amînî şermezar kerdî vatî, "Ma verê cinîyê ke hemverê dîktatorî de Rojhelat û li Îran de xo ver dayê û venga pêro cinîyan kenê ke hemverê wehşetî bêveng nêmanê."

 

Îran de 14ê êlule de cinîya kurde Mahsa Jîna Amînî hetê polîsê exlaqî yê Îranî ra bi bahaneyê ke çend têlê porê aye teber de mendê û goreyê waştişê rejîmî sereyê xo nêpişta, bi îşkence girewtî nezaret û seba îşkence ci rê ame kerdiş, 16ê êlule de nêweşxaneyê ke ci de ameyîne dermankerdiş, dinyaya xo bedelnaye. Dimayê qetilkerdişê Jîna Mahsa sere de cinî rojhelatê Kurdistanî û bi hezaran kesî vejîyayî kuçeyan û hemverê rejîmî de sere wedarnayî. Bi amancê şermezarkerdişê kiştişê Jîna Mahsa bi pêroyî yê Kurdistanî û xeylêk cayê bînî ê dinya zî seba paştdayîş bidê çalakîkeran, vejîyayî meydanan û hêrişê hemverê Mahsa Jîna ke netîce de dinyaya xo bedelnaye  şermezar kerdî.

 

Derheqê qetilkerdişê Mahsa Jîna de ma zî verê xo da kuçeyanê Cizîrî û fikrê cinîyan derheqê serebûtî de girewtî.

 

'Ma kîşte cinîyanê xoverdayoxan de yê'

 

Wendekare Hasret Tavuz qetilkerdişê Mahsa şermezar kerd û wina vat: “Ma bi tu şiklî qetilkerdişê cinîyan qebûl nêkenê û hemverê nê yê. Xeylêk welatan de binê nameyê dînî, şîdet cinîyan rê yeno kerdiş. Bi qetikerdişê cinîyêke seba çend têlê porê aye teber de yo, ameye qetilkerdiş. Cinî hemverê qetilkerdişê Mahsa sere de Rojhelat û Îran de û bi pêroyî xeylêk cayan de vejîyayî meydanan. Ma paştdayîşê ê cinîyan kenê û verê înan de yê. Cinî ça bibê, pêro dinya de têhet de yê û paştdayîş dan yewbînan. La tena cinî ney, ganî pêro dinya hemverê nê rejîmî de bo."

 

‘Cinîyê dinya seba Jîna Mahsa bî yew'

 

Halîme Unlu zî wina qal kerd: “Ma qetilkerdişê Mahsa şermezar kenê. Beno ke ma bi fîzîkî kîşte ê cinîyan ê xoverdayoxan nêbê, la ma bi qelbê xo înan reyde yê. Gama ke mi fotografê a cinî dî, ma xo qet baş hîs nêkerd. Tu cinî îşkenceyêkê winasî û qetilkerdişî heq nêkena. Ma wazenê cinî her ca azad bo. Cinî vera tedayan her cayê dinya de vengê xo berz kenê û ganî vera her qetilkerdişî de cinî vengê xo berz bikerê. Seba ke vernîya nê qirkerdişan bêro padayîş, ganî cinî binê serdestiyê camêrdan de nêmano û çi destê înan ra bêro bikerê."

 

‘Cinî hemverê bindestî de mîyanê xoverdayîşî de yê'

 

Necîbe Keskîn zî reaksîyon mojna û vat: “Yê ke tewr zêde binê zulm û zordestî de manenê, cinî yê. Her cayê dinya de cinîyan rê bindestî ameya ferzkerdiş. Ma nêwazenê êdî cinî bêrê qetîlkerdiş. Me rewşa Îranî televîzyon de dî. Ma hêvî kenê ke gonîya a cinîya ciwan erd de nêmano û pêro cinîyê bindestî bi resê azadîya xo."

 

‘Bawerîya ma bi azadiya cinîyan esta'

 

Berîvan Dogan zî vat, ganî cinî bibê yew û wina dewam kerd: “Ma wazenê êdî cinî nêrê qetilkerdiş. La reyna zî yenê qetilkerdiş. Ganî rejîmê sey Îranî werte ra bêrê wedaritiş û pêro dinya hemverê rejîmê bi nê rengî, bibê wayîrê helwestî. Ganî êdî cinî pîya hemverê nê caardişan wurzê serê lingan û têkoşînê xo bikerê yew. Eke cinîyêke seba ke pêroyê aye ameyo asayîş, yena qetilkerdiş uca de merdimayî xelas bîya û hemverê na rewşe, vatiş peynî bîyo. Ma pey pêro heme cinîyê têkoşer ê û bawerîya ma bi azadîya cinîyan esta."

 

‘Wa cinî azadîya xo bidest bikerê'

 

Tewr peyîn Kamîle Aslane zî wina vat: "Cinî ganî wayîrê heqî bê û azadîya xo bidest bikerê. Qanûnê her dewletan cîya yo la pêroyî heme hemverê cinîyan de yê. No zî tewr peyîn Îran de xo da teber û vernîya çimanê dinya de cinîyêka ciwane bi îşkence ameye qetilkerdiş. Ma nê çî qebûl nêkneê û verê pêro cinîyanê ke hemverê hêzê dîktatorî de xo ver danê."