Bi vatişê, ‘ma camêrdî vanê çi nêfikrîyenê, nusenê' kewtî rayîr û bi sloganê, ‘qelema cinîye, rayîrê heqîqetî de ya'  bêmabên dewam dewam kena. Qelema Gurbettellî tu wext destê ma ra nêkewte û fikrê Ayfere ‘ajansêkê aydê cinî' tu wext vîrê ma ra nêvejîya. Fedekarîya Denîze bi rayîrê ma, xoverdayîşê Nujîyane bi roşnayîya rayîrê ma, cesaretê Dîlovane bi hêzê ma û ma zî bî JINNEWS.

 

Vernê de ma bi tezê Vîrgînîa sey 'odayêka aydê xo' rayîr ra şî. Dima ra ma vat, odayêke qîm nêkena, ma her ware de yê û ma odaya xo ra vejîyayî û ma ferq kerd ke ma esasê cuye de yê. Bêerckerdişê cinî û komelî, kodê serdestîyê camêrdan ê her hetê cuye de ma ver bi cigêrayîşê cîya ra berd û ma ziwanê çapemenîye vurna. Çapemenîya ke cinî sey objeyê seksî vînena, xeberanê rîpelê hêrîn ra wetayêrî nêvînena, ma hewl da ma bi her hetî, bi ziwanê cinî û qelema cinî heqîqet vajê. Nê heqîqetî de zehmetî, dej, serkewtiş û hêrs zî esto...

 

No proseso ke şîdetê serê cinîyan vejîyayo sewîyeya tewr berz, kiştişê cinîyan resayo qirkerdişê cinsî, ma vat, tu şîdet munferît nêyo. Ma hewl da ma bibê vengê merdişê biguman ke ci ra vanê; balkone ra kewte, întîxar kerd, şewat vejîya. Ma hedef kerd ke ma hemverê şîdetî, tecawuz, tacîz û bêtêduştîya hemverê cinî û tutan de bibê cewab. Ma bî vengê cinîyê ke seba Peymana Stenbolî vejîyayê kuçeyan, ma korîdorê edlîye de hemverê hukmê camêrdan, seba têkoşînê rast, seba cinîyê ke ameyê qetilkerdiş, heqîqet gêrayî. Ma bî vengê Fîrdes Babata ke bi çekê qorîcîyan ameye qetilkerdiş.

 

Ma bî vengê seba sîyasetmedara Kurde Aysel Tugluke ke bi nêweşîya  demansî kewta û nêna tahlîyekerdiş, vejîyayî kuçeyan û vatî, ‘îradeyê şarî nêeşkeno bêro muhakemekerdiş.' Ma bî vengê cinîyê ke hemverê DAIŞî û Talîbanî têkoşîn kneê. Ma bî vengê xoverdayîşê seba Jîna Mahsa Amînî ke Tehran de ameye qetilkerdiş. Ma texrîbatê heme rejîmê tedayoxan ê bi zîhnîyetê rejîmê Molla û zîhnîyetê DAIŞî yenê kerdiş, da eşnawitiş û ma seba nê soz da cinîyan.

 

Seba ma tarîxê 5 hezar serran ê cinîyê ke ameyo verpaykerdiş, bidê mojnayîş kewtî rayîr. No herikîyayîş ma berd Serhed, ma berd Botan, o zî qîm nêkerd ma berd rojawan. Ca ame ma ver bi tarîx kewtî rayîr, ca ame ma pey çîyanê rovejî vazdayî. No herikbîyayîş ma nêzdîyê heqîqetî berd. Mezopotamya de Dîcle û Firat, Çukurovayê Asî, Behrosîya Kizilirmak, Anatolyaya Mîyanên Porsuk, Marmara de Merîç bî ma û ma herikyayî sey laserî...

 

Ma bî vengê Îpek Ere, ma bî vengê Gulîstan Dokuya ke Dêrsim de ameye vînîkerdiş, ma Mûş de bî vengê Fatma, Amed de ma bî vengê Efe, Isparta de ma bî vengê Nevîne, Rakka, Dêrazor, Minbîç de ma bî vengê cinîyê ke ver bi azadî rayîr ra şîne, ma Şengal de, Memxur de bî vengê cinîyan. Efrîn, Girê Spî, Serêkanî, Cudî de bî vengê şarî. Îkîzdere, Koyê Kazî, Îkîzkoy, Akbelenî de ma bî vengê vengê pawitoxê heqê xoza. Ma bî vengê merdimê tepişteyan ê nobete de yê, ma bî vengê Dayîkê Şemeyî…

 

Bêguman demo ke ma bî veng, hînan zî ma kerdê hedefê xo. 5 serran de ma 41 rey ameyî astengkerdiş û xeylêk reyan embazanê ma şîdet dî, ameyî destbendkerdiş, kamera û makîneyê înan ameyî şikinayîş. Eştî serê buroyanê ma, embazê ma ameyî tepiştiş. Kompîturanê ma şikinayî. La reyna hêrsê înan nênişna ro. 16ê hezîrane de 16 embazanê ma tepiştî û mudûra karê nuşteyî ya ajansê ma Safiye Alagaşe zî ameye tepiştiş. Hîrê aşme yo tepişte ya. La ê herikbîyayîşê ma rê nêbî asteng. Ma roj bi roje pîl bî û cinîyan reyde bî hemray...

 

Her wext vazdayîşê ma seba heqîqetî bi. Xoresnayîşê cinîyan, seba ma kêfêkê weş bi. Ma cinîyan serê erdan ra, keye ra, kargeriyan de ard serê ekranan. No zî şewqê ma zêdeyêr kerd.

 

JINNEWSo ke kurmancî, kirmanckî, tirkî û îngîlîzkî weşan keno, vat ma estê û vengê cinîyan bêmabêne dano eşnawitiş. Ma vanê ke bêrê ma vengê xo pîya gur bikerê. No herikbîyayîşê 5 serrî yo ma wey kerd û ma ey dir pîl bî. Bi hêvîya xeylêk serranê ke ma pîya bi herikîyê dewam bikerê...

 

JINNEWS