ANQARA - Aktîvîsta Îranije Mîna Khanî vat, dimayê qetilkerdişê Jîna Mahsa Amînî, Mahsa bîya sîmgeyê cinîyan û vat, Îranije cinî bi bahaneyan ameyî qetilkerdiş û hukmatê Îranî qirkerdişê cinîyan keno.

 

Jîna Mahsa Amînî hetê polîsanê Rejîmê Îranî ra ameye qetilkerdiş. Roja ke ameye definkerdiş heta ewro seranserê Rojhelatê Kurdistanî û Îranî de çalakî dewam kenê. Hemverê çalakîyan zî hêrişêkê bi şîdet ê Rejîmê Îranî bi ca yeno. Aktîvîsta Îranije Mîna Khanî tedayê  rejîmê Îranî yê bi serran o hemverê  cinîyan dewam keno û qetilkerdişê Jîna Mahsa Amînî ercna.

 

‘Qirkerdişê cinîyan sîstematîk o’

 

Mîna da zanayîş ke zulmo ewilî yê hemverê Jîna Mahsa bi nameyê aye dest pêkerdo û vat: “Her kes Jîna bi nameyê Mahsa nas keno. Hukmat hemverê keyeyê aye, seba Kurd ê nîjandperest têgêrayo û nêverdayo nameyê Kurdkî bidê Jîna. Jîna bi keyeyê xo reyde şina Tahran û uca de seba laçika sereyê aye, bi îşkence ameye destbendkerdiş û kiştiş. No qirkerdişêkê sîstematîk ê  hukmatî yo. Verê zî cinîyan hemverê nê têkoşîn kerdibi û xeylêk cinî amebî qetilkerdiş. Bi qetilkerdişê Jîna dir aye bî sîmgeya cinîyan.

 

‘Jîna cinîya ewile nêya'

 

Mîna wina dewam kerd: "Seba laçike, cinîya ke ewil ameya qetilkerdiş bêguman Jîna nêya. Serranê ewilî yê şorişî de cinîyêke bi nameyê Homa Darabî estbî û seba tedayan mecbûr mende xo întîxar bikero. Dimayê çend serran Seher Hudayarî cinîyêke ciwane bî û wazena şêro maç temaşe bikeor la ameye destbendkerdiş û şîdet ci rê ame kerdiş. Aye zî întîxar kerd. No întîxar Îran de sey qirkerdişê cinîyan derbaz kenê. Seba ke întîxar înan rê yeno ferzkerdiş.

 

‘Keyeyî cinîyan bêveng kenê'

 

Mînaye dewam de wina qal kerd: "Seba teda û qedexeyê cinîyê ke yenê qetilkerdiş, çapemenî de zêde nêno vînayîş. Sebebê nê zî oyo ke keyeyî bêveng manenê û tedayan kenê. Sewbîna xeylêk cinîyê bînî tedayan ra yenê qetilkerdiş estê. La xeylê xo çapemenî de nênê vînayîş. Seba keyeyî qisey nêkenê. Hedîseyê Jîna de tesîrê keyeyî xeylêk zêde yo, seba înan da çapemenî û bêters qisey kerdî. Komelê Îranî nê çî eşkera qisey nêkenê. Kiştişê cinîyan niminenê."

 

‘Heqeret bi ma kenê'

 

Mîna vat, sîyasetmedarî, dîplomatî, rojnamegerê ke teber ra yenê sereyê xo pêşenê û wina bi rejîmê Îranî dir qisey kenê û vat, no heqaretêkê pîl o hemverê cinîyanê Îranijan û wina dewam kerd: "Ê sereyê xo pêşenê, heqaret bi ma kenê. No serepiştiş tercîhê cinîyan nêyo. Dimayê şorişê mengêke dima yanî Îmam Humeynî 1979ine de sere piştişê cinîyan ferz kerd û dimayê nê zî cinî vejîyayî kuçeyan û vatî, ‘Ma seba peyserbîyayîşî şoriş nêkerd, azadîya cinîyan çinbo, no komel nêeşkeno serê lingan de vindero."

 

Rejîm şêro do tedayî zî bêqedîyê

 

Mîna tewr peyîn wina vat: "Her kes hemverê polîtîkayê rejîmî yê hemverê cinîyan de bêveng o. Rejîmî demê şerê bi Iraqî dir ke her kes şerî dir eleqedar bibi, înan bi hîleyan serepiştiş kerd mîyanê qanûnî. Mumkin nêyo no rejîm şaşîyê xo fam bikero û ozrê xo biwazo. Seba ganî ewilî qirkerdişê ke kerdê qebûl bikero. La heta nika ma çîyêk wina nêdî. Eke ma biwazê, no serepiştişo ke ameyo ferzkerdiş, bêro wedaritiş ganî vernê de no îqtîdar bêro wedaritiş. Ganî ma nê wedarnê. Çîyo girîng famkerdişî nêyo. Yewin çareserî no yo."