ÊLIH - Vervatoxa Heyetê Îdarekarîya Herême ya Demokratîke ya HDPyî Halîde Turkoglu da zanayîş ke sîyasetmedarê Kurdî her tim bi tedayan reyde yenê rî bi rî û hewl danê ke pêro komelî bikerê zîndan. Halîde da zanayîş ke ganî her hetî ra vengê xo berz bikerê û her xoverdayîş, her reaksîyon muhîm o.

 

Tecrîdê serê Rayberê PKKyî Abdullah Ocalanî her ke şino giran beno û bi xususî dimayê 2015ine dima bi girankerde tecrîd qirkerdişê sîyasî, kaos û krîz zî xo dir ard. 2015ine heta nika sere de sîyasemetdarê cinî yê Kurdî bi seyan siyasetmedarê Kurdî ameyî tepiştiş.

 

12ê êlule de tepişteyê siyasî yê zîndanê cinîyan ê Amedî de mendêne, hemverê binpaykerdişanê heqan û tecrîdî, grevê vêşanîye yê 5 rojan bi amancê hişyarî kerdî. Vervatoxa Heyetê Îdarekarîya Herême ya Demokratîke ya HDPyî Halîde Turkoglu ke 20ê Gulane de bi endamîya rêxistine bi 10 kesî reyde amebî tepiştiş, 16ê êlule de ameye tehlîyekerdiş.

 

‘Ma hewl danê sîyasetê xo awan bikerê’

 

Halîde da zanayîş ke hedefgirewtişê siyasetmedarê Kurdî rewşêka girêdayeyê zîhniyetê îqtîdarî yo û vat: “Îqtîdaro bîyaye zîhniyetê serdestî yê camêrdî yo. No îqtîdar bi polîtîkayê cinsperest û dişminê Kurdan wazeno şexsê cinî de komelî rast bikero. Ma sîyasetmedarê cinî sîyasetê xo kenê. Vernîya ma de astengîyê zîhnîyetê serdestî estê. Ma sîyasetmedarê cinî yê Kurdî hemverê nê zîhniyetî sîyasetê xo awan kenê.”

 

‘Nêeşkenê ma asteng bikerê’

 

Halîde wina vat: “Rewşa bîyaye îqtîdarî tersneno. Îqtîdar bi zîhnîyetê dişmînî hêriş keno û dewam keno. La no hêriş ma têkoşînê ma ra nêkeno û nêeşkeno vernîya sîyasetê ma pado. Nêeşkenê ma asteng bikerê. Cinî pêwa astengîyê vernîya sîyasetî, hemverê bêtêduştîyê ke ci dir yenê rî bi rî têkoşîn kenê.”

 

‘Komelî kenê zîndanan’

 

Halîde dewam de wina qal kerd: “Ma welat de awanbîyayîşêkê bêdemokratîk vînenê. Tesîr serê her ca de kerdo. Prosesê zîndanî nê ra bêpar nêyê. Zîndanan sey wareyê pelçiqnayîşî û vurnayîşî vînenê. Zîndanan de xeylêk kesî yenê terorîzekerdiş û bi îdiayê endamîya rêxistine yenê tepiştiş. Pitikan ra bigîrê heta kesê 70 serrî kal û pîrî, nêweşî estê. Ma eşkenê vajê ke zîndanan bi komel pirr kerde. Bi no hewa wazenê, heyf însanan ra bigîrê.”

 

‘Mîyanê tecrîdî de tecrîd bi ca yeno’

 

Halîde vat, zîndanan de komelî pelçiqnenê û vat: “Şima merdişê bişik ê zîndanan zanê. Merdimî eşkenê zîndanan ra biewnê û demokrasîyê welatî bivînê. Zîndanê Amedî rojo ke ameyo awankerdiş, heta nika tepişteyî nêeşkenê boya xo bigîrê. Mîyanê tecrîdî de tecrîd kenê. ATK seba tepişteyanê nêweşanê giranan, raporê eşkenê tepişte bimanê dano.”

 

‘Bi kamerayan wareyê cuye tengezar kenê’ 

 

Halîde wina vat: “Tepişteyan bi kelepçeyê citî benê nêweşxaneyan. Demo ke tepişteyê newayan anê, cigêrayîşê viranî ferz kenê. Hetê wezaretê dade ra her ca de kamera bi ca kerdê. Nê kamerayê ke ameyê bicakerdiş, wareyê cuye tengezar keno. Problemî yenê ziwan, la çi heyf nênê çareserkerdiş.”

 

Ganî pêro komel vengê xo berz bikero

 

Halîde, serê grevê vêşanîye ê 5 rojan ke bi amancê hişyarî 12ê Êlule de ameyo destpêkerdiş de zî qisey kerd û vat: “Zîndana de çalakî bi sînor ê. Prosesê sîyasî reyan vernîya rojevbîyayîşê zîndanan gêno. Her xoverdayîş, her reaksîyon xeylêk girîng o. Ganî her het ra problemê zîndanan bîyarê ziwan. Tewr girîng zî wareyê weşîye yo. Ganî her hetê komelî, hemverê rewşa zîndanan vengê xo berz bikerê.”