AMED – Xeylêk rêxisitnê sazgehê sivîlî ke derheqê kiştişê Ceylan Onkole de verê Edlîyeyê Amedî de eşkerayî dayî, ardî ziwan ke  dosyaya Ceylane zî sey heme dosyayan binê bêceza de mend û wina ame vatiş: “Mabêne serra 2011-2021 de hetê hêzê dewlete ra  228 tutî ameyê qetilkerdiş.”

 

Komîsyonê Tutan ê  Şubeyê Komeleya Heqê Merdiman ê Amedî, SHUDER, Komeleya Hêvîye ya Rengarengî, Weqfê Koçberî û Merkezê Heqê Tutan ê Baroyê Amedî, verê Edliyeyê Amedî de derheqê kiştişê Ceylan Onkole ke amebî qetilkerdiş û dewaya derheqê kiştişê aye de eşkerayîye da.

 

Eşkerayîye hetê endama Komîsyonê Heqê Merdiman ê  ÎHDyî yê Amedî Eylul Ozgultekîn ra ameye wendiş.

 

Eylule, ard vîr ke Ceylan Onkola 12 serrî 28ê êlule 2009ine de gama ke heywananê xo çêrnayîne, 13 serrî verê, ewro ameye qetilkerdiş û vat.: “Dozgerê ê wextî ke cipersayîş da destpêkerdiş, derheqê dosyaya kesê ke Ceylane qetil kerdî de û bi sûcê ‘wezîfeyê xo xirap şuxulnayo’ ameyîne muhakemekerdiş de qerarê bêtaqîbî da. Dimayê ke Ceylane dinyaya xo bedelnaye, 5 serran ra dima dozgerîye 30ê Nîsana 2014ine de bi bahaneyê nêno zanayîş ke hetê kamî ra ameya qetilkerdiş, qerarê ‘cipersayîşê daîmî’ da û dosyaye wedarna rafan. Eynî wextî de derheqê kiştişê Ceylan Onkole de cipersayîşêkê baş nêame kerdiş û heqê aye yê cuye ame îhlalkerdiş. Serê na babete de Dadgeha Heqê Merdiman ê Ewropayî muracat kerd, serra 2017ine de dadgehe vat, îhlal çin o.”

 

‘228 tutan dinyaya xo bedelnaye’

 

Eylule, vat; derheqê dosyaya Ceylane de zî sey dosyeyê bînî cigêrayîşêkê baş nêameyo kerdiş û vat: “Dimayê ke Ceylane dinyaya xo bedelnaye, dima ra zî xeylêk domanî ameyî kiştiş. Goreyê raporê ÎHDyî mabêne serranê 2011-2021’an de tewr tay 228 tutî ameyê kiştiş.”

 

‘Tirkîya wa berpirsyarîyê xo bi ca bîyaro’

 

Eylule tewr peyîn wina vat: “Berpirsyarîyê dewlete yê ke heqê cuye yê heme tutan bipawo. Seba her tutêke heqê înan cuye û averşîyayîş dest ra ameyo girewtiş, ma do têkoşîn bikerê. Ma venga hukmatî kenê ke hemverê merdişê tutan, prosesêkê cipersayîşê îdarî û sûcî, bi tesîr bidê destpêkerdiş.”

 

Eşkerayîye bi çepikan peynî bî.