MERKEZÊ XEBERAN – PENê Kurdî derheqê serewedaritişê Rojhelatê Kurdistan û Îranî de wina vat: “Mas ey PENê Kurdî nê qirkerdişî û heme qirkerdişê Îranî yê serê şarê kurdî bi şîdet şermezar û mehkûm kenê. Eynî wextî de waştiş hukmatê herêma Kurdistanî zî kenê, ke tena bi şermezarkerdişî ney, hemverê desteştişê rejîmê Îranî bi hawayêkê cidî û somut reaksîyon bimojno û rayîr nêdo welatê îşxalkerde sey Tirkîya û Îranî ke herêma başûrê Kurdistanî de teror û kiştişê kurdan bikerê."

 

PENê Kurdî derheqê serewedaritişê Rojhelatê Kurdistanî û Îranî de sewbîna derheqê hêrişê Îranî yê serê Şarê Kurdî eşkerayîya nuşteyî da. Eşkerayî de hêrişî ameyî şermezarkerdiş û ame vatiş.”

 

Dewamê eşkerayî de wina ame vatiş: "Ma veng danê ke pêro hêzê mîyanneteweyî, PENê heme welatan û PENê mîyanneteweyî zî vengê cinîyê azadîwaştoxan, neteweya kurd û heme şarê Îranî bieşnawo û hemverê kerdişê dîktatorîyê Îranî û heme îşxalkerdişê Kurdistanî lazimîyê azadî, demokrasî û heqê merdiman bi ca bîyaro."

 

“Rayaumûmî rê

 

Peyena qetilkerdişê cenîka kurdî Jîna AMÎNÎ di, çand rocî ya kû rocwelatê Kurdistanî û temomê Îranî pêşengêya cenîya kurdî û kurdon di serewedertişêkî esto û ino serewedertişî sewmê xo her çeher hetê Kurdistan û dinya kerdo, bi milyonon kes wazeno şoreşêkî azadî û demokrasîyî virazî.

 

Pergalê îslamî yê sîyasî yê dîktator ê Îranî şoreşê asarînî ra zaf terseno. Weş Zono kû şoreşêkî asarîn bibo peynîya yînî. Seba inayî gala tewr wehşîyi cenîyi, kurd û şarê Îranî yê azadîwaştoxon keno, yînî qetil keno û dest sernono. Peyena înî galayon di heyonî inkay rocnameger, çalakgerê heqê merdimon cenîyi û ciwonî zî tede bi seyon reydir kurd û sewbîna merdimî qetil bîyî, bi hinzaron reydir merdim tepîşîyawo.

 

Pergalê diktator ê Îranî sey heme hewon xoverodono kû bi rayerê kurdistanfobîtêyi serewedertişê kurdon verba çimonê şarê farisî û şarê bîynî yê Îranî xirab bikero, cîyakar û terorîstê ki Îranî parçe kenî nîşan bido, seba înêyî zî gala kurdon kenî. Wazenî hayaya şarê bîynon serewederitşê şoreşî ra durî fîynî û vernîyi mîyonkewtişê şarê bîynon seba devirîyayişê şoreşî bigîro.

 

Bi ino xayle, tewr peynîyi vizêr dewleta Îranî gala êşti vaşûrê Kurdistanî û cenî û gedeyê zî mîyon di zaf kurdî, bi hewado wehşî qetil kerdî, zaf zî merdimî birîndar bîyî û rocnameger Soran Kamêran zî bi xidar birîndar bîyo.

 

Rejîmê Îranî wazeno tûlê serewedertişê pîrûn ê Îranî ververnayoxê yêyî, yan zî kurdon dest ra veco.

 

Ma sey PEN'ê Kurd ino qirrkerdişî rê û heme qirrkerdişê Îranî ayî ki şarê kurdî sero bi gizma şermezar û mehkûm kenî. Heme hilli di, waşteki hikmetê honqarê Kurdistanî ra zî kenî, ne bi teyna şermezarkerdiş, bi destdergêya rejîmê Îranî bi hewado cidî û verbaçim vertek bidî û rar nêdî welatî dagirkerî ki sey Tirkîye û Îranê kû honqarê vaşûrê Kurdistanî di teror û kîştişê kurdon virazî.

 

Bi ino hewa ma veng û gazî kenî ki heme hêzê netewmîyonî, PEN'î heme welaton PEN'ê netewmîyonî vengê cenîyonê azadîwaştoxon, netewa kurd û verba terorê temomê Îranî û heme dagirkerên Kurdistanî awzelêya azadî, demokrasî û heqê merdimon ca bîyerî.”