Rojda Aydin - Şehrîban Aslan

 

ÊLIH - Cinîyê ke tewrê konferansê TJAyî bî, tecrîdo girankerde yê serê Rayberê PKKyî Abdullah Ocalanî şermezar kerdî û vatî: “Çareserîya problemê kurdî bi azadîya Birêz Ocalanî mumkin a. Seba nê zî lazim o cinîyî bi rêxistinkerde xoverdayîşê xo dewam bikerê û no proseso xetimnaye xelas bibo.”

 

Tevgerê Cinîyan ê Azadan (TJA) bi sloganê, “Ma hemverê faşîzmî bi qerar ê û azadî de bi israr ê” 24 û 25ê êlule de Êlih de bi beşdarîya bi hezaran cinîyan 4ine konferansê xo kerd. Konferanso ke ame kerdiş de tecrîdê hemverê Rayberê PKKyî Abdullah Ocalanî û tesîrê tecrîdî yê serê komelî yew bi yew, konferans de ame ercnayîş.

 

Cinîyê ke tewrê konferansî bî, derheqê tecrîdo girankerde yê serê Rayberê PKKyî Abdullah Ocalanî de qisey kerdî.

 

‘Do têkoşînê şarê Tirkîya dewam bikero’

 

Vervatoxa Meclîsê Cinîyan ê Partîya Demokratîke ya Şaran (HDP) ya Merkezê Stenbolî Pervîn Tûnbûl, dîyar kerd ke bi tecrîdê serê Abdullah Ocalanî pêro şarê Tirkîya binê tecrîdî de yo û vat: “Seba ke nê problemî rê çareserîyêkê nêno vînayîş. Binê banê rejîmê yew camêrdî de, pêro şar binê tecrîdî de yo. Ma reyke bîn vanê ke keso ke problemê kurdî rê çareserî awan bikero Birêz Ocalan o. Ma her wext nê çî anê ziwan. Ma do nê tecrîdî tu wext qebûl nêkerê. Bi xususî zî sey cinîyê kurdî ma anê ziwan ke tu wext no tecrît nêno qebûlkerdiş. Bi giranbîyayîşê tecrîdî dir Tirkîya de kaosêk ame awankerdiş. Tirkîya de qetilkerdişê cinîyan resa sewîyeya tewr cor. Tewr peyîn embazêke ma Îran de ameye qetilkerdiş û no zî qirkernişêkê sîyasî bi. Ewro tecrîdêk kûr serê temamê Tirkîya de yeno kerdiş. Heta ke tecrîdê serê Birêz Ocalanî nêro şikinayîş, do nê probleme; kûr, qirkerdiş, feqîrî zî dewam bikero. Ma heme zî baş zanê ke çareserî Îmralî yo. Hemverê tecrîdî têkoşînê ma heta peynî dewam bikero. Ma her tim kuçe û meydanan de yê. Ma do tu wext nêvinderê.”

 

'Bi wedaritişê tecrîdî do çareserî bi ca bêro’ 

 

Hemşaredara Cizîrê Şirnexî ke vera ci qeyûm ame tayînkerdiş, Bêrîvan Kutlu zî wina vat: "Tecrîd û şer girêdayeyê yewbînan ê. Esîrgirewtişê Serekî zî destpêkê qirkerdişê şarê Kurdî, cinîya kurd e û wertewedaritişê nasnameyê şarê Kurdî yo. Labelê vernîya her çî, lazim o cinî vindertişêkê wina bimojnê ke heta no tecrît wurzo. Lazim o vindertişê cinîye na sewîyeya de biba. Cinîyê kurdî tarîx ra heta ewro, bi cesaret game eştê. Bedelê ci giran o. Tu destkewtişêk bêbedel nêbeno. Ganî ma prosesê xetimnaye û tecrîdo girankerde wedarnê. Eke tecrîtê serê Serekî wurzê, serê cinî de zî wurzeno. Seba ke pêro girêdayeyê yewbînan ê. Çareserî, azadî, pawitişê destkewtişê m abi wedaritişê tecrîdî serê Serekî de girêdaye yo.”

 

‘Ganî cinî xo bi rêxistin bikero'

 

Hemsereka HDPyî ya Mehsertî ya Mêrdînî Almazî Demîrcan zî wina reaksîyon mojna: “Seke serekî vato; ‘Şerê ma yê dinya ê hîrên, şerê zihnîyetî yo’. Rastî zî no şerê zihnîyetî yo. No sîstemo serdest bi taybetî cinîyan hedef girewt û qirkerdişêkê serê cinî de keno. Tewr peyîn zî Îran de Jîna Mahsa Amînî hetê eynî hişmendî ra ameye qetilkerdiş. Heqê tu kesî çin o ke deste xo bierzo porê cinî. Cinîyî; awankerdoxê cuye, xoza û cografyaye yê. Ewro nêeşkenê hemverê xoverdayîşê cinî û kesê têkoşer vinderê. Ganî cinî xo vera tecrîdî xelas bikera û sîstemêkê polîtîk awan bikero. Coka zî ganî cinî xo rêxistin bikero û têkoşînêkê xurt bido.”