Marta Somek 

 

STENBOL - Aktîvîsta ekolojîye ya Polen, Yurdagul Çelîk da zanayîş ke bi hezaran kesê tewrê rayîr ra şîyayîşê Cudî bîyê, hemverê şer û talanî mesajêkê xurt dayê û vat: “Tena dara verê keyeyê mi ney, dara çiyayê Cudî zî dara min a. Ganî ma nê sîstemê faşîstî birejnê û têkoşînê xo rêxistin bikerê. Ganî ma têkoşîn de bibê.”

 

Bi rayberîya Kongra Komeleya Demokratîke (KCD), Tevgerê Cinîyan ê Azadan (TJA), Partîya Herêmê Demokratike (DBP), Partiya Demokratîke ya Şaran (HDP) û Tevgerê Ekolojîyê Mezopotamyaye hemverê talanê koyê Cudî bi sloganê,  "Ma hemverê rijnayîşê şerî, talanê xoza rayîr ra şinê” bi tewrbîyayîşê hezaran kesî 17ê êlule de rayîr ra şîyayîş ame kerdiş. Her hetê Tirkîya ra kesî tewrê rayîr ra şîyayîşî bî. Ege, Behrosîya, Antaloya Mîyanên, Akdenîz û Marmara bi seyan ekolojîst û pawitoxê heqî tewrê rayîr ra şîyayîşî bî.

 

Rayîr ra şîyayîşê Cudî…

 

Bi hezaran kesî pêwa pêro astengî û zor û zehmetîyan tewrê rayîr ra şîyayîşî bî. Polîsan nuqteyê cigêrayîşî de wesayîtan bi saetan dayî vindarnayîş û GBT kerdî. Bi hezaran kesî pêwa her teda, govende kerdî, sloganan berz kerdî. Leşkeran heme rayîrî ablûqa kerdibî û şarî bi israr rayîr ra şîyayîşê xo dewam kerd. Leşkeran bi awa tezyêqine û gazî hêrişê şarî kerd la girse pêwa her çî kontarê koyê Cudî wareyê Mîlga Şantiye de ameyî têhet.

 

Aktîvîsta Ekolojîye ya Polen, Yurdagul Çelîke ya Stenbol ra beşdarê rayîr ra şîyayîşî bî, fikre xo ajansê ma rê vat.

 

‘Pêwa tedayan cesaret û qerar estibi’

Yurdagule wina qal kerd: “Hem Tirkîya hem zî Kurdistan binê tedayan de yo, her ca de rijnayîşê eklojîkî esto, qirkerdişî dewam kenê. Bi xususî Kurdistan de seba polîtîkayê şerî her ca de qedexe bi. Seba nê zî her çî verê çiman de ame girewtiş û rayîr ra şîyayîş ame kerdiş. Bi rastî no xeylêk bi erj bi. Her herêma Tirkîya ra beşdarbîyayîş bi. Ma zanayîne do ma rê astengî vejê. La ma bi qerar rayîr ra şî. Ma bi coş û cesaret rayîr ra şîyayîşê xo temam kerd. Senîn ma resayî ware, astengî vetî. Bi awa tezyeqin û gazî mudaxale kerdî. La şar xo peyser nêant. Meydan terk nêkerdî. Bi qerar çalakiya xo kerdî. Seba nê rayîr ra şîyayîşêkê zaf girîng û bi erj bi. Cudî de qirkerdişê daran dewam keno.”

 

‘Awa Yunanîstanî awa min a, daristanê Cudî zî ê min o’

 

Yurdagule bale ant serê qirkerdişê Kurdistanî zî û vat: “Reaksîyonê hemverê talanê Koyê Kazî, Îkîzdere, Akbelenî yeno mojnayîş, Kurdistanî rê nêno mojnayîş. Bêguman na polîtîkaya dewlete û şerî ya. Ma tîya de netewperestî zî vînenê. Ganî hemverê nê de têkoşîn bêro dayîş. Qirkerdişê ekolojîkî tena ê welatê ma nêyo, pêro dinyaye yo. Seba nê ganî veng bide têkoşînê ekoloji. Seba tena baxçeyê ma tena nêyo, êdî babeta dinya ya. Awa Yunanîstanî awa ma ya zî, daristanê Cudî yê min o zî. Ma hewl danê nê vila bikerê û rêxistin bikerê.”

 

‘Ganî no sîstem bêro rijnayîş’

 

Yurdagule venga pîlkerdişê têkoşîn û paştdayîşî kerd û vat: “Ma têkoşînê nê wazenê. Ganî ma seba pêro cayî eynî  reaksîyon ramojnê. Bêguman no tena bi tevgerê ekolojî nêbeno. Ganî ma pêro bibê yew û paştdayîş pîl bikerê. No tena problemê hîn kesan nêyo.  Ma wina bifikrîyê ma nêresenê cayêk zî. Ma do bi paştdayîş serbikewê.”