MERKEZÊ XEBERAN - Gerîlaya HPGyîje Dilşah Ercane ke ame îdîakerdene ke çalakîya Mersînî aye kerda, vat ke; seba ke AKP-MHPyî ci rê îmkanê têkoşînêkê demokratîkî nêverda aye verê xo dayo koyan.

 

26ê êlule de vera bînaya polîsan a Mezîtlî ya Mersînî çalakîyêke ameye kerdene. Wezîrê zereyî Suleyman Soylu îdîa kerd ke HPGyîje Dilşah Ercan (Zozan Tolan) na çalakîye kerda. Dima ra erzîya serê keyeyê Dilşahe ke Mersîn de yo. Dayîk, pî, 3 bira û hîrê wayeyê û komî de 22 kesî ameyî destbendkerdene. Keyeyê Dilşah Ercane û 12 kesî bînî, bi rojan destbendkerde mendî û dimayê îfadeyê dozgerî serbest ameyî veradayîş.

 

Wezîrê Karê Zereyî: Çalakîkerî bi paraşut ameyî

 

Dimayê ke HPGyî kesê ke çalakî kerdê, îzah kerd, Wezîrê Karê Zereyî Suleyman Soylu vat ke "Teşhîsê ci şoforê teksî kerdo" û xo wina pawit. Wezîrî dima ra îddîayê xo berd sewîyeyêka cor û vat: "merkezê Amerîka ra ameyo kerdiş" û dima ra zî vat, HPGyîjî Rojawanê Vakur û Başûrî yê Minbicî ra bi paraşut ameyê Tarsus.

 

'Seba înan metodê demokratîke wedarna ez şîya ko'

 

Hema zimnayîşê çalakîyan dewam keno, Dilşah Ercane Ajansê Xebera Firatî rê qisey kerd. Dilşahe vat, wexto ke rojnamegerîye kerdêne, ameya tepiştiş û no rast o û wina vat: " Kerdişanê rejîmê AKP-MHPyî hînî pêro îmkanê resnayîşê raştîyan û têkoşînê demokratîk-legalî qedînabî. Nê esasî ser o zaf ciwanê Kurdîstanî seba ke nê rejîmê faşîstî ra hesab bipersê vejîyenê koyan ser. Ez zî nînan ra yew a."

 

'Ez serê karê xo de ya'

 

Dilşahe vat, Ppartîya ma cara eşkerayîyêka raşte kerda û wina dewam kerd: " Ez ha wezîfeyê xo ser de ya. Sey ciwananê bînan ê Kurdîstanî erkê min o esas o ke ez rejîmê AKP-MHPyî ra hesab bipersa. Ez do layîqê ney biba.”