ŞEHBA - Endama Koordînasyonê Kongreya Starî ya Kantonê Efrînî, Ferîda Îbo derheqê serrgêra çalakîya fedaî ya Arîn Mîrkane de bale ant serê têkoşînê cinîyê kurdî û wina vat: "Çalakîya Arîn Mîrkane bî sembola têkoşîn û xoverdayîşî."

 

Tarîxê 15ê êlule 2014ine de  çeteyê DAIŞî hêrişê xo berdî serê kantonê Kobanî. Nê hêrişan de Yewîneyê Pawitişê Cinî (YPJ) û Yewîneyê Pawitişê Şarî (YPG) semedê pawitişê herra Kobanî ya îşxalkerdoxan û hêrişan kewtî tevger. Xoverdayîşê Kobanî de şerwanan xoverdayîş û têkoşînêkê pîlî dayî. Arîn Mîrkane şerwana YPJyî 5ê teşrîna verêne 2014ine de hemverê hêrişan de çalakiya fedaî kerd. Çalakîya fedayî ya Arîn Mîrkane, dinya rê  îsbat kerd ke cinî eşkena pawitişê  welat û erjê xo bikero. Nameyê nasnameyê Arîn Mîrkane, Dilara Kênc a û serra 1992ine de dewa Mîrkane ya qezaya Mobeta ya kantonê Efrînî de ameya dinya. Arîne bi vejîyayîşê çeqê şorişê Rojawanî daxilê şorişî bî û bi amancê pawitişê rûmetê şarê  kurdî mîyanê refê Yewîneyê Pawitişê Cinî (YPJ) de ca girewte. 

 

Arîne û bi hezaran cinîyê ke canê xo seba pawitişê herra xo ya îşxalkerde feda kerdî, bî sembolê têkoşînî. Cinî Rojhelatê Mîyanên rê roşnayîyêke awan kerdî û rîpelê tarîxî de bî wayîrê destanekê bi erj. Bi nêzdîbîyayîşê serrgêra 8ine ê çalakîya fedayî ya Arîn Mîrkane, Endama Koordînasyonê Kongreya Starî ya Kantonê Efrînî, Ferîda Îbo ercnayîş kerd.

 

'Çalakîya Arîn Mîrkane şarî bî hêzêkê'

 

Ferîda Îbo serrgêra şahadetê Arîn Mîrkane ard vîr û wina vat: "Semedê serrgêra şahadetê Arîn Mîrkane, ma pêro pakrewanan bi xususî pakrewanê cinîyan anê xo vîr. Her cinîyêke resa sewîyeya şehadetî, bi gonîya xo tarîxêk xoverdayîş û têkoşînî nusna. Nê cinîyan ra yewe zî xoverdayoxe Arîn Mîrkane bî ke canê xo fedayê herra Kobanê kerd, seba ke ê bin nêkewê û çeteyê DAIŞî derbazê herra pîroz nêbê. Semedê nê zî Ş. Arîn Mîrkane qerarê çalakîya fedaî da û bêters  mîyanê komê çeteyan de çalakîya fedaî kerd û komêke çeteyan kişt. Na çalakî dişminî rê bî cewab. Sewbîna şarê Kobanê hêzêk na çalakî ra girewtî û sozê heyfgirewtişî dayî. Bi na çalakîye Kobanê reyke bîn serê linganê xo de hemverê îşxalkerdişî de vindert û wayîrê xoverdayîşê Arîn Mîrkane vejîya. Bi rayîrê têkoşînê Arîn Mîrkane, Kobanî resa sewîyeya xelisnayîşî.

 

'Arîn, Avesta, Barîn bî sembolê têkoşînî'

 

Ferîda qalê sembolê cinîyê têkoşer û xoverdayoxan kerd û wina vat: "Her cayêk de herra vakur û Rojhelatê Sûrîye ke hêriş ameyo kerdiş, cinî ci de bîya wayîrê sembol û xoverdayîşî. Efrîn, Kobanî, Serê Kaniyê, Girê Spî û heta peynî Girkê Lîgê cinî uca de bîyê wayîrê sembol û têkoşînê hemverê îşxalkerdişî. Xoverdayîş, têkoşîn tersêk zerrîya dişminî de awan keno, bi xususî hemverê hêzê cinîye de biters ê. Xoverdayîş sey; Arîn Mîrkan, Sakîna Cansiz, Barîn Kobanî û Avesta Xabûre werte de bibê, tu wext îradeyê cinî nêno pelçiqnayîş. Ma do hemverê îşxalkerdişî xoverdayîş û têkoşînî xurt bikerê û wayîrê destkewtişê ke bi gonîya şehîdan ameyê bidestkerdiş, vejîyê."

 

'Çalakîya Arîn Mîrkan bî sembola têkoşîn û xoverdayîşî'

 

Ferîda tewr peyîn wina vat: "Bi israrbîyayîşê cinî, hêz û îradeyê ci her ca de do sey Kobanê bêro xelaskerdiş, semedo ke cinî semedê herra xo canê xo feda kenê. Xebatê ma zî serê bingehê xelaskerdişê cayê ma yê îşxalkerde, azadiya Rayber Apo yê fîzîkî dewam kenê. Bi ruhê Arînan û cinîyê ke şorişî de bîyê sembol, ma do xoverdayîşê xo xurt bikerê. Semedo ke xoverdayîş para ma yo û ma do biresê serkewtiş. Çalakîya Arîn Mîrkan bî sembola têkoşîn û xoverdayîşî."