ÎZMÎR - Cinîyê ke hemverê qetilkerdişê Nagîhan Akarsele bi hêrs ê vatî: "Her kesê ke dinya de vanê,  'cinî cuye azadî' do nêvinderê.”

 

Endama Merkezê Cigêrayîşî yê Jineolojiyî, rojnamegere, editora Kovara Jinolojî û akademîsyene Nagîhan Akarsele Bajarê Silêmanî yê Herêma Federe ya Kurdistanî de bi hêrişê çekdarî dinyaya xo bedelnaye. Cinîyan hemverê qetilkerdişê Nagîhane kuçeyan de hêrsê xo mojnayî û na rewşe şermezar kerdî. Cinîyan dîyar kerdî ke eslê xo de Jinolojî bîyo hedef. Sewbîna cinîyan da zanayîş ke no bi hemkarîya PDK û MÎTî ameyo kerdiş. 

 

'Hêrişî bi destê dewletan yenê kerdiş’

 

Însiyatîfê Wendekaranê Azadan ê Îzmîrî ra Bûse Aslan, da zanayîş ke Nagîhan Akarsele yew nameyê muhîm ê tevgerê azadîye bî û wina vat: "Embazê ma ewro Silêmanîye de bi hawayêkê sîstematîk bi hêrişê dewlete dir rî bi rî manenê û bi 11 guleyan yenê qetilkerdiş. Ma qetilkerdişê embazanê ma yê cinîyan ê verê zî zanê ke no çî bi destê dewlete beno. Ma zanê ma cinî bi têkoşînê xo yê hempar nê hêrişanê sîstematîk benê.”

 

'Zihniyetê Jîna û Nagîhane qetil kerd eynî yo’ 

 

Bûse bale ant serê polîtîkayê şerî yê xususî û wina vat: “Rojê vîyarte de Tehranê Îranî de Jîna Mahsa Amînî ameye qetilkerdiş. No reyna mojneno ke zîhnîyetê camêrdan ê serdest polîtîkayê şerî yê xususî serê cinîyan de kena. Heta nê polîtîkayî vînî bikerê, ma do xo ver bidê.”

 

Hemkarîya PDK û Tirkîya 

 

Meclîsê Cinîyanê Ciwanan ê Partîya Demokratîke ya Şaran (HDP) Hanife Çaçan da zanayîş ke qetilkerdişê Nagîhane de hemkarîya PDK û Tirkîya esto û wina vat: "Ma nê aqlî polîsê exlaqî yê Jîna qetil kerdî zanê. No qirkerdiş hem hemverê cinîyan, hem zî hemverê şarê kurdî yo. Wa cinî bêveng nêmanê.”

 

 

'Cinîyê ke têkoşîn kenê benê hedef'

 

Endama Paştdayîşê Morî Zilan Kubat da zanayîş ke qetilkerdişê Nagîhane tesaduf nêyo û vat: “Ma semedê Nagîhane Îzmîr de kuçeyan de bî. Waya ma ameye kiştiş. Ma zanê nê serebûtî tesaduf nêyê. Xeylêk cinîyê ke têkoşînê azadîye danê, benê hedef û yenê qetilkerdiş. Ma do cayê Nagîhane ra têkoşîn dewam bikerê.”

 

 

'Jineolojî hedefê dewletê îşxalkerdoxan o’

 

Tevgerê Cinîyan ê Azadan (TJA) Derya Kandemir dîyar kerd ke bi qetilkerdişê Nagîhane dir dişminîyê hemverê şarê kurdî vejêno werte û vat: "Jineolojî hedefê dewletê îşxalkerdoxan o. Dewleta tirke ya îşxalkerdoxe û PDK nê hêrişan wazenê game bi cinîyanê kurdan peyser bidê eştiş. Eksê ci yê qirkerdişê kurdan tewr bi hêrs keno û beno sebeb ke cepheyê kurdan ê azadîye tewr xur bibo."

 

Derya vat, no hêrişê hemverê nasnameyê cinîya azad û perçeyêkê polîtîkayê şerê xususî yo û vat, qetilkerdişê Sakîne Cansiz, Fidan Dogan, Leyla Şaylemez, Sêvê Demir, Pakize Nayir û Fatma Uyar zî nimûneyê hedefgirewtişê cinîyanê têkoşer o.

 

Derya da zanayîş ke ê do nêbê temaşekerdoxê qetilkerdişan û hêrişê serê cinîyê têkoşer û vat: "Her kesê ke dinya de vanê, 'cinî cuye azadî' do nêvinderê.