ANQARA - Anqara de 10ê teşrîna verêne ya 2015î de Nawnayîşê Aştîye de 103 kesî hêrişê DAIŞî de merdî. 103 qurbanê Qirkerdişê Garî serrgêra 7. de ameyî yadkerdene. Derheqê babete de Avukate Îlke Işike qisey kerd û ard ziwan ke seba roşnnêkerdişê qetlîyamî hewldayîşê girdi virazîyayî û no qetlîyam polîtîk o.

 

10ê teşrîna verêne ya 2015î de Konfederasyonê Sendîkaya Kedkaranê Rayapêroyî (KESK), Konfederasyonê Sendîkaya Karkeranê Şorişgêrî (DÎSK), Yewîya Tabîbê Tirkî, TMOBB û Partîya Demokratîke ya Şaran (HDP) zî mîyan de xeylê rêxistinê komelî yê sivîl û partîyê sîyasî Garê Anqara de kom bîyî û waştî ke nawnayîşê aştîye pê bîyarî. DAIŞî nawnayîşê aştîye de qirkerdiş viraşt û mîyanê şarî de teqayîş pê ard. Qirkerdiş de tewr tay 103 merdimî ameyî qetilkerdene û 500 merdimî zî birîndar bîyî. 

 

 103 qurbanê Qirkerdişê Garî serrgêra 7. de yenê yadkerdene. Her çend ke qetlîyamî sero ra 7 serrî derbaz bibo zî derheqê hêzê ke asayîşê nê çeteyan pê ardî û goş nêdayî îxbaranê derheqê înan de tu tehqîqat nêame akerdiş. Keyeyê qerbanîyan vera kursîyanê vengan yê kesê şikin yê fîrarîyan de têkoşîn dayî. Derheqê babete de Avukate Îlke Işika ke avukatanê Dewaya Qetlîyamê 10ê Teşrîna Verêne yew a, prosesê dewaye ercnaye. 

 

'Şima kaos wazenê, ha şima rê kaos' 

 

Îlkeye daye zanayene ke heme dewayê ke dewlete tede yena minaqaşakerdiş de çi ameyo cuyayîş se dewaya 10ê Teşrîna Verêne de o çî  ameyo cuyayayîş û wina vat: “Hezîrane û Teşrîna Peyêne ya 2015î de Tirkîya de çina ame cuyayîş hema zî yeno munaqaşakerdiş. Her ker hema zî nê persan pers keno. Seba ke weçînayîş estbî, vatêne acaba do çîyê winasî bêrî cuyayîş. Ameyêne vatiş ke do acaba Davutoglu çîyê ke ameyî cuyayî vajo. Ma qala rojêka wina krîtîk kenî. 10ê Teşrîna Verêne îqtîdarîya sîyasî ya AKPyî newera tesis kerd. Ma nê vatişan xo vîra nêkenê ‘Şima kaos wazenê, ha şima rê kaos’.”

 

 Prosesê hukmî

 

Îlkeye bale ant serê prosesê hukmî û wina vat: “8 aşmî qerarê nimitişî pey berê padaye de cipersayîş estbi. Dima ra dewa akerdî û îdianameyêk bi xof amade kerdî, heta delîlî ameyî nimitiş, dozgerî delîlî nimitî û suc kerd. 7 serrî yo ma dozgerî ra ganî çîyê bêrê kerdiş, wazenê. Ma hema qalê kêmîyan kenê. Hema ma vanê ganî delîlî bêrê."

 

Di serrî û nîm de dewa qedênayî

 

Îlkeye dewam de wina vat: "Dewa babeta 2016ine de dest pêkerd û tebaxa 2018ine de qedîya. Semedê şikdarê tepişteyî dewa qedênayî. Dosyayêka pîlî ya ceza waştî, di serran de biqedênê. 103 kesî dinyaya xo bedelna û bi seyan kesî birîndar bî. Şikdarê fîrarî nênê vînayîş. Semedê nê çîyêk nêno kerdiş. Bi di serrî yo ma hewl danê."

 

‘Dest nêdanê wezîfedarê îstîmlakî'

 

Îlkeye vat, tu wext dest nêdayê wezîfedarê îstîmlakî û wina vat: "Na dosya de vatî, ê xêrcê DAIŞî kesî rê nêewnîyenê. Vatî, wezîfeyê yew wezîfedarêkê îstîmlakî munaqeşe nêkenê. La qirkerdişêko pîl ame ciwîyayîş. DAIŞî bi rehetî kewtî mîyanê hezaran kesî, hêzê çewîkî bi gaz hêrişê şarî kerd û vernîya ekîbê weşîye ame padayîş. Derheqê nê de yew cipersayîşêk nêame kerdiş, derheqê polîsêk de çîyêk nêame kerdiş. Hêrişê hezîrana 2015ine û teşrîna peyêne zî hetê eynî kesan ra ame kerdiş. Bombayê ganeyî zî sînoran ra derbaz bî. Bi plankerde yenê Anqara. Kes înan nêdano vindarnayîş. Kes vernîya înan nêgîno. Pêwa hende îstîxbarat esto, Emniyetê Anqarayî mufetîşanê xo mareno û vano 62 îstîxbarat. Emnîyetê Anqereyî ra persenê û vanê, ‘şima çira tedbîr nêgirewt’ la tu cewabêke înan ra çin o. Ma persenê, gelo yew hucreyêk eşkeno nê qirkerdişê pîlî rêxistin bikero.”

 

Îlkeye sewbîna dîyar kerd ke semedê qirkerdiş roşn bibo, hewldayîşêko pîl ameyo kerdiş û vat, no qirkerdişêko polîtîk o û hema wina serê ci nêeşkeno bêro padayîş. Îlkeye da zanayîş ke eke qirkerdişê Gara Trena Anqarayî nêro roşnkerdiş, do her wext şêrê ê wextî.