Sema Çaglak

 

ŞIRNEX - Dayîka tepişteya nêweşe Tenzîle Acara ke rewşa aye her ke şina giran bena û xeylê nêweşîyê aye estî Resmîye Acare dîyar kerd ke kênaya aye ne yena tedawîkerdiş û ne zî verdîyena.

 

Rewşa tepişteyê nêweşe yê ke zindan de zî her ke şina xirab bena. Nê tepişteyan ra yew zî Tenzîle Acare ya. Tenzîle ya ke 2ê Sibata 1995î de qezaya Hezexî ya Şirnexî de dadîya x ora bî, tedaya ke domanîya xo de bi keyeyê xo reyde dî vera mîyanê partîyê sîyasî de ca girewt. Tenzîleye Şirnex û bajaranê bînan de mîyanê xebatanê sîyasîyan de ca girewte û serra 2017î de şî Stenbol. Tenzîle Stenbol de ameye tepiştiş û 6 serrî yo ke Zîndanê Cinîyan yê Bakirkoyî de yena tepiştiş.

 

Tenzîleye lîsteya tepişteyan ya Komeleya Heqanê Merdiman (ÎHD) de ca gêna û nêweşîyê sey zerika kronîkî û nêweşîya kanserê zare aye de estî. Tenzîleye seba ke muayeneyê bi kelemçekerde yê wextê sewqkerdişê nêweşxaneyî de nêwazena nîna tedawîkerdiş û rewşa aye her ke şina giran bena. 

 

‘Tim vera zilm û neheqîyan de vejîya’ 

 

Dayîka Tenzîleye Resmîye destpêkê qiseykerdişê xo de qala kênaya xo kerd û ard ziwan ke Tenzîle wayîrê şexsîyetêk bi aqil û zerrîgerm bî û vat: “Kênaya mi şenikatîya xo ra bi aqil bî û têkilîya aye bi komelî reyde xurt bî. Tu wext zilm û neheqî qebul nêkerd û nika zî qebul nêkena. Bi taybetî zî babeta cinî û dadîyan de hîssin a. Seba averberdişê cinîyan xeylê kede dana.” 

 

‘Dermanê aye nînê dayîş’

 

Resmîye dîyar kerd ke dermanê kênaya aye goreyê nêweşîya aye nînê dayîş û wina vat: “Kênaya mi demêk dergo ke nêweş a. La ne dermanê aye yene dayîş û ne zî yena tedawîkerdiş. Dermanê ke danî zî aye rê baş nînê. Goreyê sereyê xo dermanan danî. Bi kelemçekerde bene nêweşxane. Kênaya mi zî nê muameleyi qebul nêkena. Sewbîna qawişê înan xeylê reyan yenê bedilnayîş û her reye înan kenê qawişê dergan. Xeylê reyan erzenê qawişan ser û dest ronenê kitab û kelepulanê înan ser.”

 

‘Ne tedawî kenê ne zî tehlîye kenê’

 

Resmîyeye qiseykerdişê xo yê peyênan de vat ke no demêk dergo ke aye nêeşkena şêra pêvînayîşê kênaya xo û wina peynî ard: “Mi rewya aye nêdîya. Domanê mi estî û ez nêeşkena înan tena biverda. Sewbîna rayîr xeylê dûrî yo. Coka ra seba pêvînayîşê akerde îmkanê mi zêde çinî yo. Ez wazena pêro tepişteyê nêweşî serbest bêrî verdayîş. Ne tedawî kenê û ne zî tehlîye kenê. Qanûnê înan çinî yo. Zîndanan ra cenaze vejîyenê. Ma nêwazenê wina bibo. Zerrî û qesebaya dayîkan vêşena. Ganî aştîyêk viraza û heme tepişteyê ma serbest bêrî verdayîş. Waştişê ma dayîkan tena aştî ya.”