MERKEZÊ XEBERAN - Meclîsê Şarî yê Demokratîkî yê Mexmûrî dima ke derheqê ablûqa de selahîyetdaranê Iraqî reyde pêvînayîş kerd eşkerayîyêke daye û vat: “Ma do îradeyê xo teslîm nêkerê, xo ver bidê.”

 

Artêşa Iraqî serê sibayî bi wesayîtanê zirxînan, polîs û hêzanê taybetan kerd ke Kampa Multecîyan a Şehîd Rûstem Cûdîyî (Mexmûr) pê têlan bigêra binê ablûqa. Vera xîretê ablûqa bi seyan roniştoxê Mexmûrî xo ver danê.

 

Heyetêkê Meclîsê Şarî yê Demokratîkî yê Mexmûrî derheqê ablûqa de selahîyetdaranê artêşa Iraqî de pêvînayîş kerd. Pêvînayîş saetan ra dima qedîya. Dima nameyê Meclîsê Şarî ser o Fîlîz Budak eşkerayîyêke daye.

 

Fîlîze eşkerayîye de vat: “Artêşa Iraqî pê polîs û leşkeran kerd ke kampe bigêra binê ablûqa. Ê heqê ma yê cuye û îradeyê ma çin hesibnenê.  Hukmatê Iraqî qet yew meseleya ma çareser nêkeno, asayîşê ma nêpaweno û dormeyê kampe de kuleyan virazeno. Ma saetêke pêvînayîş kerd û waşt ke kuleyî wa nêrê awankerdene. La ê zî bi israrî vanê ke kuleyan awan bikerê. Ma do îradeyê xo teslîm nêkerê û xoverdayîşî rê dewam bikerê. Îradeyê ma do dewleta tirke yan zî Iraqî rê pêşkêş nêbo. Ma do ser bikewê.''

 

Eşkerayîye bi sloganê ‘Bijî Berxwedana Mexmûrê’ qedîyaye.

 

Çalakîya xeyme ya şarî dewam kena.