Sema Çaglak

 

ŞIRNEX - Demêk dergo ke Şirnex û qezayanê ci de her ca de mabenê şar û polîsan de pêkewtiş mîyan de yî. Hemsereka HDPyî ya Bajarê Şirnexî Sabuha Akdage bale ant zextê serê şarî û da zanayîş ke yeno waştiş ke Botan de pêkewtiş bêro vetiş. 

 

Demêk dergo ke Şirnex û qezayanê ci de mabenê polis û şarî de pêkewtiş qewimîyeno. Her şewe raşteyê Cizîr û qezayanê ci de polîsî gazê îsotî erzenê serê şarî û hemwelatijî bi hêrişê polîsan yê cîyayan reyde rî bi rî manenê. Bi taybetî zî nê hêrişê ke pê yenê bi prosesê weçînayîşî reyde zêde bî. Hema hema her taxê qezayan de wesayîtê zirxî gêrenî. Tewr peynî Silopîya de netîceyê pirodayîşê wesayîtê zirxî de tutêk 5 serrî bi giranî birîndar bî. Derheqê babete de Hemsereka Partîya Demokratîke ya Şaran (HDP) ya bajarê Şirnexî Sabuha Akdage qisey kerd. 

 

‘Dormeyêk pêkewtiş awan keno’

 

Sabuhaye da zanayîş ke bi prosesê weçînayîşî reyde serê şarê Botanî de hetê polîsan ra teda zêdîyayaa, asayîş kêm bîyo û vat: “Nizdîyê 2 aşmî yo ke ma prosesê weçînayîşî de yî. destpêkerdişê prosesî ra heta nika Şinex û qezayanê ci de serê şarî de zext zêde bîyo. Wazenê pêrêdayîş bivejnî. Ma her xebata xo de bi zextê polîsan reyde rî bi rî manenê. Seba ke xebatanê ma de temîyanî û coşê şarî zêde bî. Bado ke tewrbîyayîşê şarî ame diznayîş zextê polîsan yê serê ma zî zêde bî. Her xebata ma de mudaxaleyê xo zêdînenê. Şar êdî nêeşkenê keyeyê xo de bi asayî ronişo. Sebebê nê zextan û hêrişan çi yo? Qey polîs bi konvoyan taxan de gêreno û dormeyê pêrodayîş û pêkewtişî awan keno? Her şewe raşteyan de gazê îsotî erzenê şarî ser û şar na rewşe ra xeylê aciz o. bin ê hêrişan şarî sûre kenî. Reaksîyonê şarî zêde yo û wazenê nê hêriş û zextan vindarnî.”

 

‘Wesayîtê zirxî benê sebebê canê merdiman’

 

Sabuhaye dewamê qiseykerdişê xo de bale ant serê zêdebîyayîşê hêrişan yê bi wesayîtê zirxinan û vat: “Îqtîdar vano ke ma do asayîş bîyarê nê welatî û problemê şarî çareser bikerî. La ekse ci zext û zordestî yenê kerdiş. Wesayîtê zirxî ke her taxêk de ameyî cakerdiş benê sebebê canê derdiman. Tewr peynî Silopîya de domanêk şenik netîceyê pirodayîşê wesayîtê zirxî de bi giranî birîndar bî û nika nêweşxane de yeno dermankerdiş. Ma xeylê reyan bîyî şahid ke hûmarêk zêde yê domananê kurd gêrayîşê wesayîtê zirxinan yê raşte û taxan vera dinyaya xo bedilnenê, ya zî birîndar benê. Wesayîtê zirxî qey hende zêde yî û raşteyan de gêrenî? Ganî selahîyetdarî na rewşe bivînî. Bi serran o hêrişê şarî kenê û zilm kenê. Ma wazenê vernîya nê zilm û zextî bigêrî. Weçînayîş de Cizîr de hûmarêk zêde raya xo da Partîya Çep a Keske. Acaba seba ke nê çîyî tehamul nêkenê hêriş kenê.”

 

‘Şarê Botanî wayîrê îradeyê xo vejîyeno’

 

Sabuhaye dîyar kerd ke Şarê Botanî tim wayîrê îradeyê xo vejîyeno û vat: “Bi taybetî zî serê Botanî de vindenê. Çimkî şarê Botanî heta nika wayîrê îradeyê xo vejîyayo û hertim vera zilm û zordestîye de xover dayo. Şarê Botanî seba wayîrvejîyayîşê îrade û xoverdayîşî rolê serkêşîye girewto serê mile xo. Ganî nê prosesî ra dima zî îradeyê şarî bêro qebulkerdiş.”

 

Sabuhaye qiseykerdişê xo wina peynî kerd û vat: “Ez nerazîbîyayîşê şarî ana ziwan ser. Ma veng kenê ke wa no zext û zordestîya serê şarî bêro vindarnayîş.”