Rozerîn Gultekîn

 

STENBOL - Kezban Konukçu Koke ya ke Partîya Çep a Keske ra sey Parlamentera Stenbolî ameye weçînayîş da zanayîş ke tûrê yewine de îqtîdarîya AKP-MHPyî têk şî û rêxistina şaran ser kewt. Kezbane ard ziwan ke rayîrê rijnayîşê faşîzmî bi têkoşînê hempare ya raşteyan û serê sindoqî de mumkun o û vat: “Ma do Meclîs û raşteyan de têkoşînê cinîyan gird bikerî. Seba ke serekê faşîst vînî bikero ganî ma şêrî sindoqan ser.”

 

Goreyê netîceyê nêfermî, Partîya Çep a Keske Weçînayîşê Serekomarî û Weçînayîşê Parlementerîye yê Donemê 28ine yê 14ê Gulane de 23 bajaran de 62 parlementeran şirawite meclîs. Na hûmare ra 31 hebê ci cinîyan ra pê yena. Nê netîceyî reyde vejîya raşte ke Partîya Çep a Keske serê esasê temsîlkarîya têduştîye de ameya awankerdiş. Heto bîn de xeylê bajaran de rayê Partîya Çep a Keske dîzîya eşkera vera ya ke hukmatê AKP-MHPyî serê sindoqan de kerd, derbazê AKP û MHPyî bî. Her bajarî de vera netîceyê sindoqan nêrazîbîyayîşê endamê partîye dewam kenî.

 

Yewine partîya ke tewr zêde temsîlkarîya cinîye tede esta

 

Reyna Partîya Çep a Keske weçînayîş de bî yewine partîya ke tewr zêde parlementerê cinî tede estî. 8 parlementerê ke namzedê parlementerîye yê Partîya Çep a Keske ya Stenbolî ra ameyî weçînayîş ra 4ê ci cinî bî. Stenbol ke yew bajaro ke tede her roje cinî yena qetilkerdiş, îstîsmarkerdiş, tacîz û tecawuz û vera nê de têkoşînê cinîyan tede vejîyayo raşte yo.

Kezban Konukçu Koka ke Partîya Çep a Keske ra sey Parlamentera Stenbolî ameye weçînayîş derheqê prosesê weçînayîş, amaç û hedefe partîya xo de JINNEWSî rê ercnayîş kerd.

 

Rêxistinbîyayîşê şarî ser kewt!

 

Kezbane dîyar kerd ke tîfaqê kolonyalist weçînayîş de têk şî û rêxistina şaran a şirawitişê nê tîfaqî ser kewt û vat ke hukmat weçînayîşê 7ê Hezîrana 2015î ra nata hewl dano ke kursîya xo meclîs de bi bêusûlîyan bipawa. Kezbane bale ant serê na babete ke bêusûlî tena hûmartişê rayanê sindoqan de nîno kerdiş û wina vat: “Prosesê weçînayîşî bi tena serê xo teberê demokratîke yo. Hewldayîşê hukmatî yê seba bêvengkerdişê rayê ma bi astengkerdişê rayanê ma çapemenîye de, bi tepiştişê rojnamegeranê m abi heme raybaz, bi girewtişê HDPyî û operasyonê prosesê weçînayîşî de nê prosesî de pê ame. Demêk dergo ke hetê hûmartişê rayan de problem esto. Ma hewl da ke hemverê nê caardişan de tedbîran bigêrî, la mird nêkerd. La Erdogan vera heme neheqîyan nêeşka weçînayîşê serekomarîye de ser bikewo û nisbetê rayanê AKPyî kêm bî.”

 

'Hema zî weçînayîş peynî nêbîyo’

 

Kezbane dîyar kerd ke her çend ke Serekê Pêroyî yê AKPyî Tayyîp Erdogan weçînayîş de têk şêro zî netîceyo ke yeno hêvîkerdiş seba şaran nêame destfînayîş û vat: “Ma seba ke Tayyîp Erdogan tûrê yewine de têk şêro xebetîyayî. Ganî ma zî bikewî prosesê xorexnekerdişî. Partîya ma tîya ra ver derheqê na babete de eşkerayîye dabî. Ganî prosesê xorexnekerdişî zî hêvî bido û ganî seba ke nê prosesî ra fêde bigêro bêro kerdiş. Xirabîya tewr gird a ke nika bi şaran yeno kerdiş bêhêvîbîyayîş o. ma zanê ke têkberdişê faşîzmî do asan nêbo û tena bi weçînayîşam pê nêro. Têkoşînê vera faşîzmî asan nîyo. Ma qala îqtîdarîya faşîstî kenê ke bi serran o sîstemê xo awan kerdo. Ma seba ke derb bi faşîzmî bidî muhîmî dane weçînayîşî. Hema zî no weçînayîş peynî nêbîyo.”

 

'Çareserî têkoşînê hempar ê raşteyan û sindoqan de yo'

 

Kezbane da zanayîş ke do faşîzm netîceyê têkoşînê raşteyan û serê sindoqan de têk şêro û wina dwam kerd: “Nizdîbîyayîşê Tîfaqê Miletî ya ke paye şarî raşteyan ra dûrî fîneno û babete sindoqan de kilît keno zî problemêk sîya yo. Nizdîbîyayîş û vindetişê partîya ma dîyar o. Ma na babete de rexne bi înan girewt. Seba ke faşîzm vînî bikero ganî ma rayîrê wayîrvejîyayîşê heme dînamîkê têkoşînî akerî û weçînayîşî baş biercnî. Ganî ma hewl bidî ke tûrê diyîne bi Erdoganî bidî vînîkerdiş. La netîce çi bebo wa bibo, dîyaro ke derbêk giran werdî.”

 

'Ma do vengê têkoşînê cinîyan berz bikerê!'

 

Kezbane dîyar kerd ke partîya înan seba temsîlîyetê têduştî bi xususî sîstemê hemserekî de têkoşînêk pîl danê û dîyar kerd ke goreyê weçînayîşê verî nê weçînayîşan de temsîliyetê têduştî bi dest kerdê. Kezbane vat, “Ganî temsîlîyetê têduştî seke roşnkerdişê têkoşînê cinî bêro vînayîş. Nimûne manîfestoyê ma yê weçînayîşê cinîyan deklerasyonê di-hîrê kesan o. Deklerasyonê ke çarçewayêke têkoşînê cinîyan de ameyo fîltrekerdiş de ameyo nuştiş. Demo ke ma pêkerdişê muhtemel ê hukmatê bifikrîyî, ê do dişminîyê cinî û LGBTI+ rayra berê. Seba vernîgirewtişê nê hêrişan de ma do kuçeyan, hem wareyan û hem zî Meclîs de rayanê têkoşînê cinîyan berz bikerê. No têkoşîn do tu wext teslîm nêbo. Şewa weçînayîşî de demê bêhêvîtî serdest bî, yê ke reyna hêvî dayî cinî bî ke bi eşkerayîyê xo nê caardî.

 

Venga seba raydayîşî: Wa sereko faşîst vînî bikero

 

Tewr peyîn seba tûrê dîyîn ê weçînayîşê 28ê Gulane  Kezbane venga şaran kerd ke reyke bîn şêrê serê sindoqan û rayanê xo bişuxulênê û vat: “Seba serekê faşîst vînî bikero ganî ma şêrê serê sindoqan. Ganî ma bibi muşahid. Eke ma tûrê dîyîn de bi serekê faşîst bidê vînîkerdiş, do îmkan virazîyo ke ma krîzê faşîzmî kûrkerde vindarnê. Nê firsendî dest ra medê, wa serekê faşîst vînî bikero.”