MEXMÛR - Endama Koordînasyonê Meclîsê Îştarî ya Mexmûrî Xantûr Karaye dîyar kerd ke 20ê aşme ra heta ewro şarê Mexmûrî xover dano û vat: “Ma asayîşê Mexmûrî teslîmê Iraq û PDKyî nêkenê. Çı destê ma ra bêro ma do bikerî û ma venga rayaumûmîye kenê ke derheqê babete de hişyar bibî.”

 

Hewldayîşê Artêşa Iraqî ya seba têlkerdişê dormeyê Kampa Multecîyan a Mexmûrî dewam kena. Artêşa Iraqî 20ê aşme de serê sibayî bi desan wesayîtanê zirxinan, çek, polîs, hêzê taybetan eşt kampe ser. Artêşa Iraqî hewl da ke bi telan dormeyê kampe bigêro û kuleyan rono. Hemverê xoverdayîşî de Hêzê Iraqî bi çekan hêriş kerd. Şarê Kampa Mexmûrî zî bi kerrayan cewab da înan. Netîceyê gulevarnayîşê artêşe de ciwanê bi nameyê Ehmed Emerî Mijînî birîndar bî.

 

Xoverdayîşê şarê Mexmûrî roja destpêke ra heta ewro dewam keno. Vera ablûqakerdişê kampe de xeymeyê xoverdayîşî ameyî ronayîş û bi şew û roje nobete yena tepiştiş. Bi hezaran şarê kampe mîyanê têkoşînî de yo û têlkerdişê kampe qebul nêkenê. Derheqê babete de reaksîyon û nêrazîbîyayîşî zî dewam kenê. Endama Koordînasyonê Meclîsê Îştarî ya Mexmûrî Xantûr Karaye derheqê babete de ajansê ma rê qisey kerd.

 

Xantûre destpêkerdişê qiseykerdişê xo de bale ant eşkerayîyê dezgeh û rêxistinan ê ke derheqê qewimîyayîşanê rewşa Mexmûrî de ameyî dayîş ser û wina vat: “Nê dezgeh û komeleyê ke nizdîbîyayîşê xo yê hemverê dagirkerîye mojnayî rê spas kena. Eşkerayî û hewldayîşê seba kampe bîyî moral.”

 

Hemverê Mexmûrî de operasyon

 

Xantûre dîyar kerd ke 20ê aşme de Arteşa Iraqî hemverê Kampa Mexmûrî de operasyon da destpêkerdiş û wina vat: "Merdim eşkeno operasyonî wina biercno. Kampe xeylê reyan tarîx de û demê cîyayan de bi hêrişê dewleta Tirke, hukmatê herême û Iraqî reyde rî bi rî menda. La merdim eşkeno vajo ke tarîxê awankerdişê wargehe de reya yewine serê sibayî hemverê Mexmûrî de oeprasyonêk winasî pê ame. Tena hetêk ra nê, xeylê hetan ra kampe kerdî binê ablûqa. Sey kampêk nizdî nêbîyî, seke cayê ‘teror’î bo nizdî bîyî û bi no hawa eştî kampe ser de.”

 

'Ma koçberê sîyasî yî’

 

Xantûre dewamê qiseykerdişê xo de vat ke ganî bêro zanayîş ke Mexmûr kampa multecîyanê sîyasîyan a û ganî wina bêro ercnayîş û domna: “No 30 serrî yo ke ma sey multecîyê sîyasî Mexmûr de cuyewnê. Nizdîbîyayîşê hukmatê Iraqî ewro hemverê ma de ameyo mojnayîş, merdim eşkeno vajo ke dewamê sîyasetê serranê 94an yê dewleta Tirkîye yo. Ewro hukmatê Iraqî waştişê dewleta Tirke pê ano. Bi taybetî badê weçînayîşê 14ê Gulane de pê ame û her çend ke Erdogan ser nêkewto zî hewldayîşêk wina hemverê kampe de pê ame. Nê prosesî de AKP û MHP waşt fêde bigêrî û hêzê Iraqî seferber kerd. Hewldayî hêrişê kampe bikerî. No çî girêdayeyê hukmatê herêma Kurdistanî pê ame. Hukmatê Iraqî û Neteweyê Yewbîyaye (NY) berpirsîyar î. Ê zî şîrikê nê kerdişan î.”

 

'Ma xerîbê hêrişan nîyê'

 

Xantûr Kara, qiseykerdişê xo de wina bale ant serê helwestê şarê Mexmûrî: "Cuya ma, fehmê ma û sîyasetê ma yê wargehî diyar o. Seba nê zî hukmatê Iraqî, Tirkîya û herêma Kurdistanî nêeşkena hemverî çîyêk bikero. Nêeşkenê bi nêzdîbîyayîşê xo yê rîsîya teda ma rê bikerê. Ma sey multecîyê wargehî tu wext tavîz nêdanê. Ma hetê bedeldayîşî de amade yê. Xora ma hemverê hêrişan de xerîb nîyê la heta nika netîceyê hêrişan da birîndarê ma virazîyayî. Operasyonê tewr peyîn de ciwanêk ma bi guleyê hêzê Iraqî birîndar bi. Ciwanê ke birîndar bi paşta xo ra birîndar bi. Tîya de merdimî bêçêk ê, sivîl ê û multecîyê sîyasî yê. Ameyîşê înan ê bi tang û topan yeno manaya şerê xususî û şerê psîkolojî yê hemverê Mexmûrî. Hemverê helwestêk wina de vindertişê şarê Mexmûrî, vindertişê ciwanan ercê pîrozkerdişî yo. Ma reyke bîn vanê çi bikewo serê milê ma, ma amade yê."

 

'Ma do pawitişê xo bikerê'

 

Xantûre dîyar kerd ke bi çend rojî yo çalakîyê  pawitişê wargehe yeno kerdiş û vat: "Roja ewilî ya operasyonî ra heta nika ma serê lingan de yê û ma çalakîyê cîya kenê. Xeymî ameyî ronayîş. Şewe û roje xo ver danê. Tenê cayêk wargehî de nê ma her ca de mîyanê xoverdayîşî de yê. Şar bi xo asayîşê xo gêno. Ma asayîşê xo teslîmê Iraq û PDKyî nêkenê. Senîn heta ewro û 30 serrî yo ma pawitişê xo kerd, ewro ma do reyna pawitişê xo bikerê. Sewbîna heta nika ma xo senîn rayra berdo ma do tîya ra tepîya zî xo rayra berê. Ma do wayîrê sîstemê xo vejîyê. Ma wayîrê felsefeyê Rayber Apo, şehîdanê xo vejênê. Ma  do rol û mîsyonê xo bi ca bîyarê.”

 

'Şarê Mexmûrî do serbikewo’

 

Xantûre dîyar kerd ke ganî rayaumumî derheqê babete de hîşyar bo û wina vat: "Bi xususî vengdayîşê ma seba şarê kurdî û seba komelê ke  heqê merdiman pawenê esto. Sazgeh û dezgehê sivîlî ganî rol û mîsyonê xo bi ca bîyarê. Ganî paştdayîşê wargehî bêro kerdiş. Seba tacidarkerdişê serkewtişê wargehî paştdayîşê teberî muhîm o. No serkewtiş tenê bi Mexmûrî pê nîno û ganî şarê ma yê  teberê welat û heme partîyê sîyasî xebatêke hempar rayra berê. Tu hêz nêeşkeno hemverê xoverdayîşê ma vindero. Kes nêeşkeno hêzê komelî û hêzê Mexmûrî bero. Do şarê Mexmûrî serbikewo."