Marta Somek 

 

STENBOL - 20ê adare de tepişteya edlî Duygu Korale Zîndanê Kandiraye de bi hawayêk şikin dinyaya xo bedilnaye. Her çend ke bêro vatiş ke întîxar kerda zî bedenê aye ser de şopê kuyayîşî ame tespîtkerdiş. Avûkata Duyguye, sereka pêroyî ya ÎHDyî Eren Keskîne dîyar kerd ke do heta peynî dewaye taqîp bikerê û vat ke înan gore no cînayet o.

 

Serranê peyênan de hûmara tepişteyanê ke zîndan de yenê qetilkerdiş zêde bîya. Goreyê raporê zîndanan a 2022yî yê Komîsyonê Zîndanan ê Komeleya Huqûqnasê Seba Azadîye (OHD) serra peyêne de zîndanan de 50î ra zêdeyêr tepişteyê edlî û sîyasî bi hawayêk şikin dinyaya xo bedilna. Tepişteya bi nameyê Garîbe Gezere zî 9ê kanûna 2021î de Zîndanê Tîpa Fyî yê Hûmara Yewine yê Kandiraye de ameybî qetilkerdiş.

 

Bade Garîbeye zî 20ê adare de tepişteya edlî Duygu Korale goreyê îdîayan zîndan de cuya xo peynî kerda. Duyguye verê ke dinyaya xo bibedilna pêvînayîşê telefonî de dayîka xo rê vana ke hetê gardîyayan ra şîdetêk giran vînena. Otopsîyê Duyguye de zî şoxpê kuyayîşî bedenê aye de ame tespîtkerdiş. 

 

Avukata Duyguye û Sereka Pêroyî ya Komeleya Heqanê Merdiman (ÎHD) Eren Keskîne derheqê şikan de ajansê ma JINNEWSî rê qisey kerd. 

 

‘Cinîyêk ke qet yew raye daxî mergî nêfikirîya’

Erene dîyar kerd ke Duygu tepişteyêk edlî bî û wina vat: “Cinîyêka ciwan a 28 serrî bî. Bi sebebê edlî yê sey bi şixulnayîşê tîryakî zirar daya malê dewlete di serrî ceza aye rê ameybî birnayîş. Goreyê keyeyê aye Duyguye cinîyêke winasî bî ke qet yew raye mergî nêfikirîyayêne. Her tim bi coş û kelecan bîya. La xebere dayî û vatî ke întîxar kerda. Garîbe zî Kandiraye de dinyaya xo bedilna. Zîndanê Kandira zîndanêk bi şikin o. Ma hedîseyê Garîbeye zî baş zanî. Wirdî hedîse zî manenê yewbînan. Wirdî cinî Garîbe û Duyguye îtîraz kenî. Çîyê ke bi înan yenê kerdiş qebul nêkenê.”

 

Îdîaya gardîyanan ber girewtî

 

Erene da zanayîş ke goreyê gardîyanan şewe saete 20.00î de wexto ke xebera aye ra nîna girewtiş kewenê şikan û şinê zerre û wina vat: “Vanê berê banyoye hetê zerre ra girewta. Ma bi serran o şinê zîndanan. Zîndanan de mifte çin o. Tepişte seba ke mifte çin o nêeşkenê hetê zerre ra berî bigîrê. Vanê wexto ke ber akerdê xo banyo de daliqnaye vînayî. La nêvanê bi çi xo daliqnaya. Gardîyanî îfadeyê şikin vanê. Duyguye 40 kîlo de bî.  Vanê ‘Duyguye hêrişê ma kerda’. Cinîyêk 40 kîlo bî û gardîyan vanê ma bi kask û kalkan kewenê odeya aye. Acaba qey bi kask û kalkane kewenê odeya cinîyêk 40 kîlo. No raştî zî nakokî yo û merdim pê bawer nêkeno.”

 

Bedenê aye de rêça derban

 

Erene dîyar kerd ke keyeyî fotografê otopsîyê Duyguye anto û vat: “Ma zî dî û bedenê aye de rêçê derbkerdişî û mor bibî. Ma întîxar qebûl bikerê zî  goreyê rewşa merdimêke wina gelo çira hucreyê yew kesî de yena tepiştiş û şîdet ci rê yeno kerdiş. Çira bi kask û qalxanan kewenê zerre û şîdet ci rê yeno kerdiş. Nê pêro şikdarî zêde kenê. Goreyê keyeyî Duyguye heqê xo gêrayîne. Duyguye wayîrê hişmendî bîye û îtîrazê nêheqî kerdêne. Keyeyê zî vat, do heta peynî taqîbkerdoxê babete bibê. Ma do zî bi keyeyî reyde têkilî de bê û taqîbkerdoxê serebûtî bibê. Duyguye telefon de her tim vata gardiyanî şîdet ci rê kenê. Serdozgerîya Komare ya Kandirayî de rojêke dimayê serebûtî cipersayîş da destpêkerdiş la hema averşîyayîşêk çin o. Dozgerî dosyaya Garîbeye ra ewnîyeno, seba na dosyaye zî ameyo wezîfedarkerdiş. Goreyê ma no merg bi her hawayî cînayet o. Dewlete zî întîxaran ra berpirsîyar a.”