WAN - Cinîyan reaksîyon mojna hêrişê artêşa Iraqî yê sîstematîkî ke hemver Kampa Mexmûrî de pê ano û vera nê zilmo ke bi kurdan yeno kerdiş venga têkoşînî kerdî. 

 

Serranê peyênan de hem artêşa Iraqî û hem zî Tirkîya bi hawayêk sistematik hêrişê Kampa Multecîyan a Şehîd Rûstem Cûdîyî ya Mexmûrî kenê. Bi hezaran Kurdî serranê 90an de vera zextê dewlete koçê Mexmûrî kerd û bi kedêka gird Mexmûr açarnayîş raşteyêk cuye. Artêşa Iraqî 25ê Gulane de dormeyê Mexmûrî bi telan girewt û saetanê serê sibayî de zî bîrê awe girewt. Cinî û ciwanê Mexmûrî reaksîyon mojna hêrişê artêşa Iraqî û hêriş têk berd.

 

Vera hêrişê hemverê Mexmûrî reaksîyon dewam kenê. Cinîyê wanijî derheqê babete de ajansê ma rê qisey kerdî.

 

‘Tu kesêk bi şer û hêrişan nêeşkeno bido qezenckerdiş’

 

Cinîya bi nameyê Makbule Bedîre reaksîyon mojna hêrişan û dîyar kerd ke ganî kurdî hemverê hêrişan de bibê yew û vat ke tu kes bi şer û hêrişan ser nêkeweno.

Makbuleye vat ke yewine waştişê înan aştî û asayîş o.

 

Dîlan Çîçeke zî da zanayîş ke gelo na teda do heta key dewam bikera û wina dewam kerd: “Vera teda, tepiştiş û mergî têkoşînê ma dewam keno. Do her şert merci de dewam zî bikero. Rayberê PKKyî Abdullah Ocalanî ser de tecrîdêk giran esto. Wa no tecrîd wedarîyo. Bi hezaran tepişte estê. Şarê kurd do xover bido.”

 

‘Raya xo bidêne aştîye’

 

Şefîka Dînçe vat ke hêrişê hemverê Kurdan her ca de dewam keno û seba weçînayîşê roja yewşeme yê serekomarîye zî veng kerd: “Ma raya xo bidî aştîye. Ez dayîkanê Mexmûrî silam kena. Tîya de şar xover dano û hêrişan puç keno. Do şar xover bido. Wa no zilmê serê kurdan peynî bibo.” 

 

Endama Meclîsê Dayikê Aştîye Perîşan Aslane zî wina qisey kerd: “Ez hêrişan şermezar kena. Şarê kurd ê ke vera zilmê dewleta tirke de koçber bî nika zî raştê zilmê Mesut Berzanî yeno. Ganî no hêriş bi lez bêro peynîkerdiş.”

 

‘Bi Erdoganî reyde bîyo yew û kurdan rê zilm keno’ 

 

Tewr peynî cinîya bi nameyê Rabîa Algure qisey kerd û vat: “Ez venga Mesut Berzanî kena. Do Berzanî hesabê nê zilmî rojêk bido. Wa xo vîra nêkero. Ez xoverdayîşê şarê Mexmûrî silam kena. No hêriş bi şew û roje vîrê ma de yo. Wexto ke Berzanî Iraq de ame weçînayîş ma xeylê kêfweş bîbî. Bi Erdoganî reyde bîyo yew û kurdan rê zilm keno.”