Şehrîban Aslan

 

DÊRSIM - Parlamentera Partîya Çep a Keske Ayten Korduye problemanê bîyayeyan ercnaye û vat: “Ma do probleme bajaran komelî reyde çareser bikerê. Wexto ke ma çareser bikerê zî ma do zîhnîyetê serdestî pakî bikerê û çareser bikerê.”

 

Parlamentera Partîya Çep a Keske ya ke weçînayîşê 14ê Gulane yê serekomarî û parlementerîye yê demê 28ine de Dêrsim ra ameye weçînayîş Ayten Korduye derheqê weçînitişê xo û probleme bajarî de ercnayîş kerd. 

 

Şarê Dêrsimî cewabêke gird da

 

Aytene da zanayîş ke şarê Dêrsimî waştişê parlementa cinî kerd û no bajar bajarê cinîyan o û wina vat: “No bajar de keda cinîye zaf gird a. Bawerîya elewîtî de cayê cinî komelî de zaf muhîm o. Şaredarê ma yê verêne Edîbe Şahîn û Nurhayat Altune bî. Embaza ma Aysel Dogane sey parlamenter ameybî weçînayîş. La parlamenterîya aye ameybî xespkerdiş. Coka ra waştişê parlamenterê cinîye estbî. Mi zî layiqê nê çîyî dîyî. Ez Partîya Çep a Keske ra ameya weçînitiş. Ma serberz ê.” 

 

‘Ma do vajî Gulîstan Doku kam ca de ya’

 

Aytene bale ant serê qewimîyayîşê Gulistan Dokuye ser û wina dewam kerd: “Dêrsim de problemê girdi estê. Problemê koçberî, betalî bi hawayêk cidî yenê ciwîyayîş. Polîtîkaya bêmerdimveredayîşî yena rayraberdiş. Na polîtîka demêk dergo ke esta. Serê cinî û ciwanan de polîtîkaya tîryak û rayîrravejîyayîşî yena rayraberdiş. Bajarê ma de hema zî Gulîstan Dokuye yena persayîş. Ma meclîs û bajar de bi cinîyan reyde taqîpkarê na babete yê. Ma do têkoşînê seba Gulîstane dewam bikerê.” 

 

‘Derheqê asayîşî de şik esto’

 

Aytene dewamê qiseykerdişê xo de da zanayîş ke wexto ke dewan gêrayêne problemê dewijan goşdarî kerda û vat: “Dewijî vatêne ke wexto ke şinê heywananê xo çerênenê timî yenê taqîpkerdiş. Coka ra zî hetê asayîşî de şike înan estê. Dewijî vatêne dûrî ra bi dûrbînan yenê taqîpkerdiş. Nimune cinî nêşinê çerênayîşê heywanan. Tersenê. Derheqê cuya xo de şikê înan estê. Cinî seba tutanê xo tersenê. Ma do derheqê na babete de meclîs û dezgehan reyde bikewê têkilî û çareserî bîyarê.”

 

‘Ma do bi ewnîyayîşê cinîye probleman çareser bikerê’ 

 

Aytene qala xespkerdişê heqan yê sey Peymana Stenbol û qanûnê hûmara 6284î zî kerd û vat: “Ma vera xespkerdişê heqanê xo de xebata xo hîna zêde rayra benê. Pêşnîyazê ma yê wezîrîya cinîye esto. No seba ma zaf muhîm o. Ganî butçeyêk bêro cîyakerdiş. Seba çareserîyan ganî butçeyêk xoser biba. Bajar de ma lazimîya xebatêk hempar dî. Bajarê me de hêvîyêk temsîlkarîya cinîye esto. Ma do probleman zîhnîyetê serdestî ra pake çareser bikerê.” 

 

‘Ma do peynîya rejîmê yewcamêrdî bîyarê’

 

Aytene tewr peynî vat: “Ma do peynîya rejîm yewcamêrdî bîyarê. Îqtîdar bi dizî şî turê diyîne. Coka ra ma wina vanê; Tabî ma rejîmê yewcamêrdî 14ê Gulane de da vindarnayîş, ma do turê diyînî de zî peynîya rejîmî bîyarê. Ma seba nê çîyî têkoşîn danê û raşteyan de yê. ma venga xo bi heme şarî kenê. Ma wayîrê sindoqanê xo bivejê û tesilî ganî ma şêrî sindoqan ser. Ganî ma îqtîdarî bişirawê.”