Melîke Aydin

 

ÎZMÎR - Endama Heyetê Rayîrberîya Komeleya Multecîyan a Konakî Cevher Tosune dîyar kerd ke multecî prosesê weçînayîşî de bi vatişanê nefretan ê sîyasîyan reyna bîyê rojeve û vat ke sîyasetmedarî seba rayan pêser bikerê bi topê dişmentî û nîjadperestîye kay kenê. Cevhere vat ke seba problemê multecîyan bêro çareserkerdiş ganî Tirkîya Sûrîye ra bianca.

 

Endama Heyetê Rayîrberîya Komeleya Multecîyan a Konakî Cevher Tosune derheqê ziwanê şîdetî yê ke prosesê weçînayîşî de ame şuxulnayîş û hemverê multecîyan de rayîrê neferetî akerde de ercnayîş kerd. 

 

‘Problemê welat yê multecîyan reyde benê yew’

 

Cevhere da zanayîş ke multecîyî Tirkîya de merheleya tewr cêr de ca gênê û heto bîn de zî vera şert û mercê ekonomîye de têkoşîn danê û wina vat: “Heto bîn de hêrişê nîjadperestî reyde yenê rî bi rî. Goreyê embazanê xo hîma kêm heqdest herînenê. Heme karkerî yenê binpaykerdiş la yê koçberî hîna zêde yenê binpaykerdiş. La cînayetan de destdergî û heme bêehlaqîyan de multecî yenê sucdarkerdiş. La seke yeno zanayîş roje verêne Zonguldak de kesêk tecawuzê tutêka di serre kerd.”

 

‘200 hezar multecî rayan erzenê’

 

Cevhere ard ziwan ke nifusê multecîyan 6 mîlyon o û mîyanê înan de 3 mîlyon û nîme sûrîyeyijî û wina dewam kerd: “Înan mîyan de 200 hezar multecîyî zî raye erzenê. Yanî nuqtaya ke weçînayîş dîyar bikerê de nîyê. Coka ra sebebê feqîrî û betalîya ke yenê ciwîyayîş hetê sîyasetmedaran ra bene babeta gazarî. Vanê ke qey multecî şêrî do problemê feqîrîye raşte ra wedarîyo. La tu eleqeya ci çin o.”

 

‘Sebebê betalî û feqîrî multecî nîyê’

 

Cevhere dewamê qiseykerdişê xo de bale ant sebebê feqîrî û betalîye ser û vat: “Sebebê înan multecî nîyî. Heta ke ma nê çîyî fehm nêkerî do ma verbi faşîzmî ra bibo. Na babete de wezîfe keweno serê mile rêxistinanê sîyasî, komelê sivîl û komeleyan ser. Bi taybetî sendîkayî ganî vajî ke sebebê betalî û krîzî multecî nîyê. Seba ke problemê multecîyan çareser bibo ganî aştî pê bêra. Koma OSO ke çeteye ci hetê welatê ma ra yenê erşirawitiş, Sûrîye bombarduman kenê û yê vera nê de bêveng manenê. Ganî ewro problemê multecîyan nîyarê rojeve. Netîceyê teşwîqkerdişê şerî yê hetê Tirkîya ra multecîyî ameyî welatê ma.”

 

Cevhere qiseykerdişê xo wina peynî kerd: “Sîyasetmedarî seba rayan pêser bikerê bi topê nîjadperestî û dişmenîye kay kenê. No top do destê înan de biteqo. Ganî ê her çî ra ver leşkere xo tîya ra biancê û biwazî ke nê merdimî agêrê.”