MERKEZÊ XEBERAN - Şarê wargehê multecîyan ê Mexmûrî 8 rojî yo bêmabên hemverê pêro hêriş û hewldayîşê artêşa Iraqî yê seba ablûqakeedişî xo ver danê.

 

20ê Gulane ra artêşa Iraqî hewl dana derûdorê Wargeha Multecîyan ê Şehîd Rûstem Cûdî (Mexmûr) bi têlan ablûqa bikera. Seba nê zî bi seyan leşkerî, pêwa wesayîtê zirxî, wesayîtê kar şirawitê derûdorê wargehî.

 

Pêwa pêro pêvînayîşan û sozê selahîyetdaranê Iraqê zî, leşkerê Iraqî hewl danê derûdorê wargehî de xendekan bikolê, têl bikerê û kuleyan ronê.

 

8 roje yo ke bêmaben şarê Mexmûrî 7 serrî ra heta 70 serrî vera nê hewldayîşî de xeyme ronayo û nobete tepişenê.

 

Tewr peynî 25ê Gulane de artêşa Iraqî hewl da ke cayê stratejik yê dormeyê Mexmûrî bi leşkeran pir bikero, bi no hawa dormeyê Mexmûrî bigêro û dest bi kinitişê xendekan kerd. Nê caardişan ra dima şarê kampe vernîya kinitişê xendekar girewt û bi destanê xo xendekan bi herre pir kerd.

 

Xoverdayîşê şarê Mexmûrî yê vera artêşa Iraqî bêmaben binê xeymeyan de dewam keno. Binê xeymeyan de nobete yena tepiştiş û tepiştişê nobete de dîmenê rengini yê xoverdayîşî vejîyenê raşte. Cinî û doman deyîranê xoverdayîşî vanê.