ÎZMÎR - Hemsereka OHDyî ya Îzmîrî Şukran Ozturk da zanayîş ke binpaykerdişê heqan ê zîndanan û rewşa tepişteyê nêweşan her ke şino giran beno û vat, serê zîndanan de mesajê, ‘şima hemverê dewlete vejîyê, şima do nêweş bikewê, şima do nêrê veradayîş, ma îmkanê dermankerdişî nêdanê şima û şima do zîndanan de bimirê’ danê komelî. Şukrane vat, ganî rêxistinê komeleya sivîl û rêxistinê meslegî rê vajê êdî bes o.

 

Hemsereka Komeleya Huqûqnasê seba Azadîye (OHD) ya Îzmîrî rewşa zîndanan ercna û dîyar kerd ke bi pandemî reyde binpaykerdişê heqan ê zîndanan zêde bîyê, dimayê pandemî hîn astengîyan dewam kerdê û vat, na babete de berpirsyarîya meclîsî pîl o. Şukrane dîyar kerd ke tepişteyê nêweşî terkê mergî yenê kerdiş û ATK zî qerarê sîyasî dano. 

 

Goreyê dayeyê Komeleya Heqê Merdiman (ÎHD) 2022yîne de 78, 2023ine de serê serre ra heta nika 15 tepişteyî dinyaya xo bedelnayî. Sewbîna 651 ci ra giran bi pêroyî hezar û 517 tepişteyî nêweşî estê. Tewr peyîn tepişteyo bi nameyê Abdulhalîm Kirtay ke 30 serrî bi tepişte bi 22yê Adare de ame veradayîş û 12ê Gulane de dinyaya xo bedelnaye. Tepişteyo bi nameyê Behçet Kaplan zî 2014ine de ame tepiştiş 15 serrî ceza ci rê ameye birnayîş û 9 serrî bi ke tepişte bi. Behçetî 15ê Gulane de dinyaya xo bedelnaye.

 

‘Zîndanî rewşa nêweşan tewr giran kenê’

 

Şukrane da zanayîş ke problemê weşîye zîndanan de  zêde benê û vat, ATK raporê xo weşîye ra dûr ercnenê, qerarê sîyasî danê û vat: “Ma nika qalê hezar û 600 kesî kenê. Nê tepişteyê nêweşî rewşa înan baş nîya û mumkin nîyo zîndanan de bimanê. Zîndanan de sîstemêk weşîye baş çin o. Şirawenê  revîran û dima ra zî sewqê nêweşxaneyan kenê. Babeta sewqkerdişî de zî problemî yenê ciwîyayîş.”

 

‘Qerarê ATKyî sîyasî yê’

 

Şukrane bale ant serê qerarê ATKyî û vat: “Ganî na babete de sererastkerdişêk cidî bêro kerdiş. Berpirsyarîya meclîsî esta. Na babete de kontrolkerdiş û sererastkerdişê wezîfeyê Komîsyonê Heqê Merdiman ê TBMMî yo. Ganî no komîsyon bi rêk û pêk bişuxulîyo. Serê zîndanan de mesajê ‘şima hemverê dewlete vejîyê, şima do nêweş bikewê, şima do nêrê veradayîş, ma îmkanê dermankerdişî nêdanê şima û şima do zîndanan de bimirê’ danê komelî. Ganî rêxistinê komelê sivîl û rêxistinê meslegî nê ra vajê êdî bes o.”

 

‘Caardişê keyfî dewam kenê’

 

Şukrane dewamê qiseykerdişê xo de dîyar kerd ke  binpaykerdişê heqan ê Zîndanan Herêma Egeyî zîndananê bînan de zî dewam kenê û vat: “Herêma Menemenî de zîndanêk rehabîlîtasyon ê Tîpê R esto. La uca de zî xo resnayîşê xizmetê weşîye watayêr, hewl danê tepişteyan stabil bigîrê. Demê pandemî de xeylêk heqî ameyî sînorkerdiş û wedaritiş. Dimayê pandemî qerarê veradayîşê bi şert û ercnayîşê rewşa baş yan nêbaş yenê şuxulnayîş. Caardişê pandemî de kewtî meriyet, dewam kenê. Nê qerarê tu hetê hiqûqî nêhewênenê, dewam kenê.”