ANQARA - Eşkerayîya derheqê aşma 137ine ê Qirkerdişê Roboskî ame kerdiş de wina ame vatiş:  “Roboskî şermê na herre, birînê nîno kewênayîş û cigêrayîşê edaletî yo. Heta ke berpirsyarê Roboskî ke dejî ra fedî kerd dewlete fedî nêkerd, hesab nêdê nêeşkenê behsê helalbîyayîş û edaletî bikerê. Ma xo vîr ra nêkerd, xo vîr ra nêkenê û ma nêdanê xovîrrakerdiş.”

 

28ê Kanûna serra 2011ine de netîceyê bombavaranê teyareyê dewleta tirke de dewa Roboskî ya Qilebana Şirnexî de 19 ci ra tutî bi pêroyî 34 sivîlî amebî qetilkerdiş. Hewldayîşê seba Roboskî rê Edalet aşma 137ine de seba weçînayîşî eşkerayîyêke nuşteyî weşan kerd û wina vat: “11 serran de berpirsyarî nêameyî muhakemekerdiş, edalet pê nêame, muhakemekerdişêk bi tesîr nêame kerdiş. Dewlete şarê xo qetil nêkena, hêrişê şarê xo nêkena û bi hawayêk nêheq nêgîna. Demo ewro zî reya dîyîn kewenê prosesê weçînayîşî nêheqî, bêhuqûqî, nêbîyayîşê aştîye û tedayê dewlete dewam kenê. Herême de bi desan kesî sindoqan ra berpirsiyarê yenê destbendkerdiş. Zîndanan de tepişteyê nêweşî terkê mergî yenê kerdiş, 11 bajarê ma mexdûrê erdlerzî terkê nêbîyayîşî yenê kerdiş. Berpirsyar reyna dewlete û bêedaletî ya. No sîstemo ke şer, çeke, rant û seba rayraberdişê hukmatê xo budçe visneno, demo ke dore ameye ma tu wext nêbi dewleta komelî û vînîbîyaye ya.”

 

‘Roboskî cigêrayîşê edaletî yo’

 

Eşkerayîye de ame dîyarkerdiş ke do qetî hesabê qirkerdişî bipersê û wina ame vatiş: “Roboskî îmtîhanê dewlete û îqtîdarî yo. Rayîrê edalet û aştîye yê serê na herre ewilî do Roboskî ra derbaz bibo. Roboskî şermê na herre yo, birîno ke nîno kewênayîş û cigêrayîşê edaletî yo. Heta ke berpirsyarê Roboskî ke dejî ra fedî kerd dewlete fedî nêkerd, hesab nêdê nêeşkenê qalê helalbîyayîşî û edaletî bikerê. Ma xo vîr ra nêkerd, xo vîr ra nêkenê û ma do nêdê xovîrrakerdiş.”