COLEMÊRG - Endamê Meclîsê Dayîkê Aştîye yê Geverî reaksîyon mojnayî hêrişê hemverê Mexmûrî û dîyar kerdî ke ganî her ke wayîrê Mexmûrî bivejîyo, vera şerî de vindero. Dayîkê Aştîye dîyar kerdî ke kurdî bi serran o xover danê û do xover zî bidê.

 

20ê Gulane ra nata artêşa Iraqî hewl dana Kampa Multecîyan a Şehîd Rûstem Cûdî (Mexmûr) bi têlan bigêra binê ablûqa. Seba nê zî bi seyan leşker, bi wesayîtê zirxî û bi wesayîtê karî erşawite dormeyê kampe. Vera heme pêvînayîşan û sozan selahîyetdarê Iraqî zî leşkerê Iraqî zî hewl danê dormeyê kampe de xendekan bikinê, têl bikerê û kuleyan ronê. Endamê Meclîsê Dayîkê Aştîye yê Geverî reaksîyon mojnayî hêrişê hemverê Mexmûrî û venga peynîkerdişê hêrişan kerd.

 

‘Ma wazenê şer bêro vindarnayîş’ 

 

Emîne Atake dîyar kerd ke hêrişê hemverê Memxûrî şermizar kenê û her tim şer û zextî serê Kurdan de yenê rayraberdiş û wina vat: "Vera şarê kurdî de şer û zilm yenê rayraberdiş. Ez nê hêrişan lanet kena. Her tim hêrişê şarê kurdî kenê. Kurdî vera nê hêrişan de xover danê. Wa fek nê hêrişan ra vera bidê. Gelo do no şer heta ça dewam bikero. No şer propagandaya dewleta tirke û Berzanî yo. Bi serran o rehetî nêdanê şarê Mexmûrî. Ambargoyan pê anê. Ma Dayîkê Aştîye wazenê no şer peynî bibo.”

 

‘Wa wayîrê Mexmûrî bêro vejîyayîş’

 

Emîneye peynîya qiseykerdişê xo de da zanayîş ke yewine waştişê înan aştî û azadîye yo û vat ke ê her tim vera zilm û tedayan de xover dayî û do vera şerî de sere wedarnê û wina peynî kerd: “Mexmûr herra şarê kurdî yo û kurdî do tîya ra nêvejê. Wa fek polîtîkayanê şerî ra biverdê. Ez wazena kurdî wurîzê payan ser. Şarê kurdî bi serran o xover dano û do xover bido.”

 

‘Ma îşxalkerdişê Mexmûrî qebûl nêkenê’ 

 

Zahîde Şene zî ard ziwan ke bi rojan o no xoverdayîşê şarê Mexmûrî televîzyonanra temaşe kena. Zahîdeye nê çîyan vat: “Ganî zextê serê Mexmûrî bi lez bêrê peynîkerdiş. Kesê ke uca de ciwîyenê zilmê dewleta tirke vera koçê uca kerdî. Ewro ma vînenê ke uca de şer û teda estî. Tu kurdêk ganî nê çîyî qebul nêkero. Berzanî zî kurd o. Qey nê hêrişan qebul keno? Wa bi lez na şaşî ye ra tepîya game bierzê. Ma nê caardişan qebul nêkenê. Wa peynîya nê şerî bêro ardiş. Ganî kurdî vera hêrişan de bibê yew. Ganî kesê wayîrê wijdan vengê xo berz bikerê. Hema ku çîyêk bi kesêk neameyo ganî no hêriş peynî bibo.”