Şehrîban Aslan

 

AMED - Muxabîra MAye Ceylan Şahînlîye roniştişo ke 16ê Gulane de ame dîyîş de tehlîye bî û vat: “Wexto ke ma dayî persayîş ver, endamtîya DFGyî, xeberanê ke ma viraştî pers kerdî. Acaba rojnameger senî xeberan virazê? Esasê xo de yewine cewabê nê persan esto, no zî rojnamegerîya ma yo.”

 

Serdozgerîya Komare ya Anqaraye 25ê Teşrîna Verêne ya 2022î de bajaranê cîya cîyana de 11 rojnamegeran destbend kerd û ard Anqara. Badê îfadeyî Mudira Karê Nuşteyî yê Ajansê Mezopotamya Dîren Yurtsever, muxabîr Selman Guzelyuz, Denîz Nazlim, Bêrîvan Altan, Emrullah Acar, Hakan Yalçin, Ceylan Şahînlî û Zemo Aggoz, Mehmet Gunhanî ke tepişte nêameyêne muhakemekerdiş û muxabîra JINNEWSî Habîbe Eren, Oznur Degere ke 29ê Teşrîna Verêne ya 2022yî de ameyî tepiştiş û muxabîrê Yenî Yaşamî Hamdullah Bayramo ke 20ê Adare de ameybî tepiştiş û roniştişê înan ê yewine 16ê Gulane de Mehkemaya Cezaya Girane ya Anqaraye de ameybî dîyîş.

 

Heyete mehkema badê mabenî qerar da ke vîşêrê Hamdullah Bayramî heme rojnamegerî serbest bêrê veradayîş. Nê rojnamegerê ke serbest ameyî verdayîş ra yew zî Ceylan Şahînlîye bîye. Ceylan Şahînlîye hem prosesê ke cuyayî û hem zî sucdarîya hemverê înan ercnaye.

 

‘Ma bi fikro ke ame awankerdiş ameyî tepiştiş’

 

Ceylane dîyar kerd ke serra verêne aşma Hezîrane de rojnamegerî ameyî destbendkerdiş û tepiştiş û vat ke ê zî hema hema bi eynî babetan û îfadeyê şahide nimite ameyî destbendkerdiş û domna: “Xeyle embazanê ma îşkence kerdî. Hewl dayî îmajê teslîmgirewtişî awan bikerê. Mîyanê dosyayî de derheqê ma de çîyêk tepiştişî nêvêrtêne.”

 

‘Cewabê heme persan rojnamegerî yo’

 

Ceylane dazanayîş ke rojnameger seba rayaumûmîye kesê ke dezgehê dewlete kontrol kenê û wexto ke nimuneyê rojnamegerîye bêro ewnîyayîş zî xeberê ke dewlete esas gênê yenê viraştiş. Ceylane wina dewam kerd: “La ganî rojnamegerî şarî esas bigîrê. Ganî dewlete cayêk ke kontrol bikera de vindera. La seba ke ma kişta şarî de ca gênê ma sucdar kenê. Ma xeberanê xo vera ameyî muhakemekerdiş. Bi endamtîya rêxistine ameyî muhakemekerdiş. Wexto ke ma dayî persayîş ver, endamtîya DFGyî, xeberanê ke ma viraştî pers kerdî. Acaba rojnameger senî xeberan virazê? Esasê xo de yewine cewabê nê persan esto, no zî rojnamegerîya ma yo.”

 

‘Çîyêko nimite çin o’

 

Ceylane dîyar kerd ke wextê îfadeyê dozgerî de îfadeyê şahide nimite ameyo persayîş û wina dewam kerd: “Şahid seba mi wina vato; ‘Sey stajera Anqaraye xebetîyena. Dima ra şîya Riha’. Erê no raşt o. mahrece xeberan de xora ca gêno. Na rewşêka nimite nîya. Mi heyetê mehkema rê zî vat. Reyna îdîaname de 149 xeberan vetî vernîya mi. Yanî xeberan weçînayî û vetî vernîya ma.”

 

‘Hesab persenê’ 

 

Ceylane vat, dimayê tepiştişê înan rojnameger Hamdullah Bayram zî ameyo tepiştiş û ajanî Hamdullahî rê ferz kerdê û wina vat: “Hamdullahî ra vanê, ‘ti bibe şahidê nimite ti do nêrê tepiştiş.’ Embazanê ma ra vatê, ‘ti vaje serê nameyê rêxistine de şuxulênê bes o’. Bi no hawayî ma vîna ke şahidê nimite zî senî vejenê werte. Hetê sucî ra tu çîyêke somut vejê vernîya ma çin o. Xeberanê ma, faliyetê rojnamegerîye vetî vernîya ma. Ma bi rojnamerîye ameyî muhakemekerdiş.”

 

Vengdayîşê seba roniştişî 

 

Ceylane sewbîna veng da û vat: “15ê Hezîrane de dewaya embaza ma Safiye Alagaş yeno vînayîş û 11ê Temmuze de zî yê embazanê ma bînan yeno vînayîş. Ez venga pêro STK, rojnameger û pawitoxê heqî kena ke tewrê roniştişê rojnamegeran bibê.”