MERKEZÊ XEBERAN - Cinîyê ke dormeyê Kampa Mexmûrî de xover danî dîyar kerdî ke ê do têkoşînê xo ra gamêke tepîya nêerzê û û vatî: “Wazenê Mexmûr bikerê sey hepsê serakerde. Nizdîyê 28 serrî yo ke ma na kampe de ciwîyenê. Ma serê herra xo de yê. Ma qet fek têkoşînê xo û kulturê xo ra vera nêdanê. Wa raşteyê mîyanneteweyî zî wezîfeyê xo bîyaro ca.”

 

20ê gulane ra nata artêşa Iraqî kena ke dormeyê Kampa Multecîyan a Şehîd Rûstem Cûdîyî (Mexmûr) pê têlan û kuleyan bigêra û bigêra binê ablûqa. Şarê Mexmûrî roja destpêkerdişî ra nata vera hewldayîşê ablûqakerdişî de qet nêviderto. Şarê Mexmûrî xoverdayîşê xo yê vera artêşa Iraqî rê dewam keno. Leşkerê Iraqî hewl danê ke bîrê awe ya kampe bigêrê binê kontrolê xo û awa ke şina kampe bibirnê. Cinîyê Mexmûrî ke vera hewldayîşê ablûqakerdişî de xover danê, qisey kerdî. Cinîyan qiseykerdişê xo de vat: “Ma aştî, way û biratî, têduştî wazenê. Ma xirabî nêwazenê. Ma tîya de yê, qet ma fek têkoşîn û kulturê xo ra vera nêdanê. Heta ke ma bimirê ma do xover bidê.” 

 

'Ma qet fek têkoşîn û kulturê xo ra vera nêdanê’

 

Dayîka şehîdî ya bi nameyê Mêrxas, Narinç Karaye ke vera hewldayîşê ablûqakerdişê Mexmûrî de nobete tepişena û xover dana, dîyar kerd ke no 42 serrî yo ke aye seba dewaya têkoşînê şarê kurdî xover dana. Narinçe vat ke aye do peynîya dewaya xo de biba û domna: “Ma muhacir ê, ma nê kesî çi ma ra wazenê? Roja ewile ra nata ma xover danê û kesêk wayîrê ma nêvejîya. Nika zî hêrişê ma kenê. dewleta tirke û Mesûd çi ma ra wazenê? Wa bela xo ra nêkerê. Ma aştî, way û biratî, têduştî wazenê. Ma xirabî nêwazenê. Ma tîya de yê, qet ma fek têkoşîn û kulturê xo ra vera nêdanê. Heta ke ma bimirê ma do xover bidê.”

 

 

‘Wazenê Mexmûr bikerê sey hepsê serakerde’

 

Rayîrberîya Meclîsê Şarî ya Kampa Mexmûrî Cîhan Kaplane da zanayîş ke ê têkoşînê xo yê vera zilmî dewam kenê û wina dewam kerd: “Ma xover danê. La tu hawayêk zî hukmatê Iraqî fek qerarê ablûqakerdişê Mexmûrî ra vera nêdano. Roje de reyêk di reyan hêrişê ma kenê. Nizdîbîyayîşêk wuşk mojnenê. Heta nika Mexmûr zî gamêke tepîya nêeşt. Ma vat ke ma do qet gamêke tepîya nêerzê. Çike waştişê Hukmatê Iraqî, hemkarê ci Tayyîp Erdogan û PDKyî ma nêeşkenê tu şeklêk zî pê bîyarê û ma do pê nîyarê. Waştişê înan no yo ke kampe bêra ablûqakerdiş û bi telan bêra girewtiş. Wazenê Mexmûrî bikerê sey hepsê serakerde. Nizdîyê 28 serrî yo ke ma kampe de ciwîyenê. Ma serê herra xo de yê. Ma koçberê sîyasî yê. Ma tu xirabî û zirarêk nêdayo tu kesî.”

 

'Wazenê awa ma bibirnê’

 

Cîhane ard ziwan ke Hukmatê Iraqî wazeno awa înan bibirno û wina qiseykerdişê xo peynî kerd: “Ê rêxistina ma qebul nêkenê. Wazenê ma çinî bibê. Wazenê bi fikir, îdeolojî û zanistîya xo ma Serekarîtîyê ma ra dûrî bîfînê. Ma nê zilmê qet qebul nêkenê. Coka ra ma do nêverdî ê bikewê mîyanê ma. Ma mîyanê ablûqayî de yê. Wazenê awa ma bibirnê û cereyanê kampe bibirnê. Wazenê erzaqê ke kewenê mîyanê kampe asteng bikerê. Sewbîna wazenê îradeyê ma teslîm bigîrê. Ma nê çîyî heta nika qebul nêkerd. Coka ra venga ma şarê kurdî û şarê dinya rê esto. Yê ke vanê ez kurd a, yê ke vanê ez seba merdimîye xizmet kena ganî ewro vengê xo berz bikero, paştî bido Kampa Mexmûrî. Wa raşteyê mîyanneteweyî zî wezîfeyê xo bîyaro ca.”