Melîke Aydin

 

HATAY - Antakya de tewr tay seba 7 taxan projeyê banan kewt dewre û seba înan erdan zî îstîmlaqkerdiş reyna keweno dewre. Dewa Dikmeceye ra Zeynep Korkmaze da zanayîş ke nê erdî erdê elewîyê ereb ê û vat ke heqê înan ê akerdişê dewaye zî çin o. Sewbîna Zeynepe vat: “Lazimîya ma bi dostê ke eşkenê çareserî pê bîyarî rê esto.”

 

6ê Sibate de merkezê ci qezayê Bazarci û Elbîstan ê Mereşî de di erdlerz qewimîya. Badê erdlerzî îhaleyê seba viraştişê banan û nêweşxaneyan kewt dewre. Dimayê nê çîyî zî qerarê ‘îstîmlaqkerdişê bi lez’ ame dayîş. Seba îstîmlaqkerdişî zî xeber nêdîya wayîrê erdan. Îhale zî dîya fîrmayê sey RECî yê girêdayeyê Kalyon, Ronesans Holdîngî. 

 

Zeynep Korkmaza ke Taxa Dikmeceye de manena da zanayîş ke ê bi rayîrê memûrê ke seba peymekerdişî ameyî erdan û keyayê taxe îhale eşnawitî û vat ke bi taybetî erdê erebê elewîyî yenê îstîmlaqkerdiş. Zeynepe da zanayîş ke do nê semedî ra xeylê kesî mecbur bimanê ke koç bikerê.

 

'Ma rê nêame vatiş, do zeytûnanê ma wedarnî’

 

 

Zeynepe dîyar kerd ke kesêk înan rê çîyêk nêvato û ê bi rayîrê memûrê ke seba peymekerdişî ameyî erdan û keyayê taxe îhale eşnawitî û wina vat: “Kesêk ma rê çîyêk nêvat. Mudaxaleyê cayê ma yê cuye kenê. Ma şikin ê. Destê ma de çîyêk bîn çin o. Keyeyê ma şî. Tena zeytûnê ma mendî û yeno waştiş ke ê zî bêrî wedaritiş. Wazenê keda ma ya bi serran desteser bikerê.” 

 

'Binzemînê erdî goreyê erdlerzî nîyo’

 

 

Zeynepe da zanayîş ke erdê ke seba projeyî ameyî weçînayîş erdlerzêk bîn de eşkeno reyna awanîyan birijno û domna: “Binzemînê erdî goreyê erdlerzî nîyo û ma qesawetin ê. Ganî tedbîr biameyêne girewtiş. Nifusê yew taxêke tena 7 hezar o. Tîya de kesêk koç nêkerd. Yê ke nêweşê înan estbî şîyî teberê bajarî û dima ra reyna ameyî. Nê projeyî de ma çin ê. Wazenê tay kesanê bînan bîyarî. Beno ke wazenê ma koç bikerê. Çim verdayî ban û erdanê ma.”

 

'Çîyêk ma vînî bikerê nêmendo’

 

 

Zeynepe ard ziwan ke awankerdişê bajarî de ganî bi şar û muhendîsan reyde diyalog bêro viraştiş û vat: “Malê dewê cîranî şîyî la e-dewlete ra rewşe musayî. Pereyêk zaf tay, seke yarîya xo bi ma bikerê şirawitî hesaban. Çîyêk ma vînî bikerê nêmendo. Muxatabê ma çin o. Kesêk ke bêro ma ra biperso zî çin o. Tena ma îdareyê xo bi citkarî kenê. Nisbetê wendişî zêde yo. Ciwanê ma KPSS de zêde puan herînenê la kar de bi ca nêbenê. Cinî erdan de xebetîyena, camêrd zî şino teberê welatî. Eke herra ma şêra ma do se bikerê? Ma do sere wedarnê û dewijanê bînan ra paştîdayîş hêvî kenê.” 

 

'Ê serê ma ra wazenê biresê rantî’

 

 

Zeynepe dewamê qiseykerdişê xo de dîyar kerd ke erdê Taxê Dikmeceyê û taxê Kuzeytepe, Karali, Serinyol, Toygarli, Orhanli û Alazî seba îstîmlaqkerdişî ameyî akerdiş û vat ke erdlerzî ra ver ê musayî ke do erebê elewî tîya ra bêro koçkerdiş û herinda înan de zî koçber û tirkî bêrê cakerdiş. Zeynepe wina vat: “Ma vatêne do wina nêbo, la bado ke ma proje dî êdî ma bawer kerd. La do hende asan zî nêbo. Cenazeyê ma vînîbîyaye yî û hema zî binê xirban ra nêameyî vetiş. Badê erdlerzî hirê rojan projeye înan vejîya raşte. Asîyeno ke bi nîyetêk baş nêameyo viraştiş. Ma terkê mergî kerdî." 

 

'Ma wazenê ameyoxêk tutanê xo rê verdê’

 

Zeynepe da zanayîş ke awankerdişê Nêweşxaneyê Dewlete ya Antakyayî û teyaregehî pêwa îqazkerdişê şarî hema dewam keno û vat: "Erdlerz de nêweşxane rijya. Teyaregeh zî zimistanî binê awe de mend. Ma nêwazenê reyna eynî kabûsî biciwîyê. Ma cuyêka weşîye wazenê. Ma bedel dayî. Ê canê ma zî bigîrê ma nînan nêdanê. Ma nêwazenê hîna zêde kes bimiro. Ma wazenê ameyoxêk tutanê xo rê verdê. Ma nêwazenê bêrê xovîrrakerdiş.”

 

 

'Xirbê ke nêameyê wedaritiş tehluke yê’

 

Zeynepe da zanayîş xirbê ke nêameyê wedaritiş tehluke yê û wina vat: "Hîn keyeyê nêameyê rijnayîş estê û nê zî seba tutan tehluke yê. Ma hêvî kerdêne ma wayîr vejîyê labelê çim dayî erdê ma. Rayîrê dewa ma zî padeye ya. Ma nêeşkenê berê hukm. Tu rayîrê ma yê serewedaritişî wetayêr çin o. Lazimîya ma  dostê ke bieşkê çareserî pê bîyarê, esto."