Şehrîban Aslan

 

DÎLOK - Parlamentera Partîya Çep a Keske ya Dîlokî Sevda Karacaye tedaya serê rojnamegeran û tepiştişê înan de qisey kerd. Sevdaye dîyar kerd ke têkoşînê rojnamegeran ê nuştişê heqîqetî û edaletî mîyanê yewbînan de yê û vat ke seba ke rojnamegerê kurdî serbest bêrê veradayîş do meclîs û her ca de têkoşîn bikerê.

 

8ê hezîrana 2022yî de çarçeweya tehqîqatê serdozgerîya komare ya Amedî ke dabî destpêkerdiş de midura ajansê ma Safîye Alagaş zî tede 22 kesî ameybî destbendkerdiş û 16ê hezîrane de 16 rojnamegerî ameyî tepiştiş. Îdîanameyê rojnamegeran 10 aşmî ra dima ame amadekerdiş û roniştişê yewine do 11ê temmuze de bêro dîyîş. 

Îdîanameyê Safîye Algaşe zî roşan ra ver ame amadekerdiş û 11 aşme ra dima rojanê verênan de hetê dadgehî ra ame qebûlkerdiş. Safîye zî 13ine aşmê tepiştişê xo de do 15ê hezîrane de roniştişê aye yê yewine bêro dîyîş. 

 

25ê Teşrîna Verêne ya 2022yî de zî çarçeweya tehqîqatêk cîya yê serdozgerîya komare ya Anqaraye dabî destpêkerdiş ra midura karê nuşteyî ya ajansa Mezopotamya Dîren Yurtsever, muxabîr Berîvan Altan, Ceylan Şahînlî, Denîz Nalim, Emrullah Acar, Hakan Yalçin, Selman Guzelyuz, muxabîrê JINNEWSî Habîbe Eren û Oznur Degere ameybî tepiştiş. Roniştişê 9 rojnamegeran zî 16ê gulane de ame dîyîş. 

 

Roja Azadîya Çapemenîye de tepiştî

 

25ê nîsane de merkezê ci Amed de operaysonê qirkerdişê sîyasî de 150 kesî ameyî destbendkerdiş û xeylê rojnamegerî zî mîyan de estbî. 192 kesê ke ameyî destbendkerdiş ra 52 kesî ameyî tepiştiş. Mîyanê kesê ke ameyî tepiştiş de rojnamegera ma Berîtan Canozer, edîtorê ajansê MA Abdurahman Gok, rojnameger Mehmetşah Oruç, Remzîye Akkaya û Mîkaîl Barut estbî.

 

Serê sibayê 29ê Nîsane de operasyono ke merkezê ci Anqara bî de Hemsereka DFGyî Dîcle Muftuoglu û edîtorê ajansê MA Sedat Yilmazî ameyî destbendkerdiş û 3yê Gulane Roja Azadîya Çapemenîye de ameyî tepiştiş. 

 

Roniştişê yewine de ameyî tehlîyekerdiş

 

Roniştişê 16ê Gulane yê rojnamegerê ke 29ê Teşrîna Verêne ya 2022yî de ameyî tepiştiş de 9 rojnamegerî ameyî tehlîyekerdiş. Xebatkarê rojnameyê Yenî Yaşamî Hamdullah Bayram dosyayêke xo yê cîya ra nêame tehlîyekerdiş. Roniştişê Safîye Alagaş do 15ê Hezîrane de û yê 15 rojnamegerê bînan zî do 11ê Temmuze de Amed de bêro dîyîş.

 

Parlamentera Partîya Çep a Keske ya Dîlokî Sevda Karacaye tedaya serê rojnamegeran ercnaye.

 

‘Serranê 90î ra heta nika teda esta’

 

Sevdaye da zanayîş ke her tim zext hemverê rojnamegeran de estbî û bi taybetî seba pelçiqnayîşî serê muxalîfan de zext zêde yo. Sevdaye wina vat: “Bi taybetî serê rojnamegeranê kurdan de zextê cidî estê. Bi amancê vernîgirewtişê vengî vatiş û têkoşînê şarê kurdî bêro girewtiş serê çapemenîya kurdî de zextî yenê rayraberdiş. No zext serranê 90î ra nata dewam keno. Bajarê herême de xeylê rojnamegerî ameyî qetilkerdiş. Xeylê rojnamegerî hetê hêzê hîzbulkontrayî ra ameyî qetilkerdiş. Hetê JÎTEMî ra ameyî qetilkerdiş.”

 

‘Wazenê çîmê înan bitersnê’

 

Sevdaye wina dewam kerd: “Prosesê weçînayîşî de zext hîna zêde bî. Sereştişê keyeyan virazîyenê. Nê prosesî de zî ma nê çîyî zaf eşkera dî. No zî mojneno ke bi nê operasyonan hewl danê çime şaran bitersnê. Ez zî bi serran mîyanê raşteyê çapemenîye de xebetîyaya, mi zî rojnamegerî kerd. Mi zî nê prosesî dî. Xeylê embazê ma zîndanan de bi aşman paweyê îdîanameyan manenê. Nê welatî de huqûq laboratuvara bêhuqûqîye de mend. Sey cerebnayîş zî rojnamgerê kurdî yenê şuxulnayîş.”

 

‘Rojnamegerê cinî bîyî parçeyê têkoşînê cinîyan’

 

Sevdaye ard ziwan ke barê giran yê polîtîkaya şerê Kurdistanî cinî ancenê û wina domna: “Lazim nêkeno ke merdim vajo. No mîyanê ciwîyayîşê ma de pê yeno. No proses seba ma betalî, şîdet û feqîrî bî. No ame manaya koçberbîyayîşî. No ame manaya şîdetî. Seba cinîyê kurdî bîyayîşê rojnamegerê cinî yê kurdî xeylê muhîm o. Rojnamegerê cinî bîyî parçeyê têkoşînê cinîyê kurdan. Bi wesîleya rojnamegerê cinî raştî vejîyenê raşte.”

 

‘Ganî ma vera hêrişan de bê’

 

Sevdaye bale ant ke vera raşteyê hêzê bi rêxistinkerde yê rojnamegerê kurdî de hêriş esto û vat: “Nimune rojnamegerê ke raşteyê xo de serkewte bî, Hemsereka DFGyî Dîcle Muftuoglu, edîtorê MA Abdurrahman Gok û Sedat Yilmazî zî mîyan de xeylê meslektaşê ma ameyî tepiştiş. No hêriş vera paştîdayîşê faalîyetê meslekî de yenê kerdiş. Ganî ma vera hêrişanê rêxistinkerdeyan de pîya têkoşîn bikerê. Ganî vera nê hêrişan de vinderê. Rojnamegerê tepişte yê ke paweyê amadekerdişê îdîanameyanê estê. Ma do meclîs de berpirsîyarîya xo bîyarê ca.”

 

‘Ma do ser bikewê’

 

Sevdaye qiseykerdişê xo yê peyênan de wina vat: “Seba ke heme rojnamegerê kurdî serbest bêrê verdayîş, newe ra vatişê xo bivajê, heqîqetî binusnê ganî ma têkoşînê edaletî bikerê. Hem meclîs û hem zî heme raşteyê têkoşînî de ma do pîya têkoşînê xo bikerê. Ma destur nêdanê bêhêvîye, ma do ser bikewê. Ez seba roniştişê 15ê Hezîrane û 11ê Temmuze yê rojnamegeran venga paştîdayîşî kena.”