Melîke Aydin

 

ÎZMÎR - Cinîyê ke paştîdayîşêk gird danê komelbîyayîşê muzîkî, dîyar kerdî ke muzîk raşteyê azadbîyayîşî awan keno û vatişî de ganî hîna zêde muzîkjenê cinîyî raşteyan de bibê.

 

Xeylê raşteyê Îzmîrî bi saya komê ke muzîk îcra kenê, hemsengî û qelebalixîya bajarî bi deyîranê rengin beno. Bi no hawa hem pere qezenc kenê û hem zî paştîdayîş danê komelbîyayîşê muzîkî. Mîyanê muzîkjenan de wendekarê ke xo seba konservatuarî hadre kenê zî estê. Yew nê muzîkjenanê amatoran ra ke mîyanê koman de ca gênê Rabîa Akiş û Asya Ozkaraye yê. Wirdî muzîkjenî zî venga paştîdayîşî kerdî.

 

‘Reaksîyonê pozîtîfî motîve keno’

 

Wendekarê ke seba konservatuarî xo hadre kenê komêke çar kesî ra pê yena û endamê kome Metroya Konarî de deyîran vanê û hem pere qezenc kenê û hem zî komelbîyayîşê muzîkî rê serkîşîye kenê. Bi pereyo ke qezenc kenê zî ekîpmananê xo herînenê. Endama kome Rabîa Akişe da zanayîş ke reaksîyonê pozîtîf yê welatijan înan motive keno û vat: “Yê ke ecebnenê zî estê, yê ke yarîya xo kenê zî estê. Yê ke paştîdayîş danê zî estê. Pere nêdê zî huyayîşê înan ma motive keno. No hêz dano ma. Sewbîna hemwelatijê ke derbaz benê kêfweş benê, kal û pîrî derbaz benê. Kêfê înan yeno. Înan ra ercnayîşê xirabî nînê.”

 

‘Ganî paştîdayîş bêro dayîş’

 

Asya Ozkaraye zî ard ziwan ke muzîk raşteyê azadîye awan keno û raşte zî cayê azadîye awan kenê. Asyaye nê çîyan vat: “Coka ra ganî ma raşteyan de bibê. Ciwan hîna zêde muzîkê raşteyî ecibnenê. Nika ma Şaredarîya Bajarê Girdî ya Îzmîrî ra qertê muzîkjenîye gênê û karê xo kenê. No het de goreyê mi Îzmîr baş o. Ganî seba ciwanan paştîdayîş bêro dayîş.”

 

‘Ekonomî tesîrê xo muzîkjenan ser de kena’

 

Asyaye vat ke wendekarê ke seba konservatuarî xo hadre kenê estê la seba ke her çî vaye yo nêeşkenê şêrê qursê amadekarîye û domna: “Şîyayîşê qursan zaf zehmet bîyo. Tay konservatuarê dewlete bi bi şeklêk amade kenê. La ganî nas bibê. Vanê bi hunerî şima qezenc nêkenê. La nika xeylê mesleyan de pere nîno qezenckerdiş. Muzîkjen zî qezenc nêkenê. Ganî no bêro zêdekerdiş.”

 

‘Bîyayîşê cinîyan ê raşteyan muhîm o’

 

Asyaye tewr peynî nê çîyan vat: “Raşteyan de hûmara cinîyê ke karê muzîkî kenî zaf tay a. No zî ma dano zehmetî. Ma muzîkî nêkerî do kam bikero. Cinî yan ra tesîr virazîyeno. Mi zî wina dest pêkerd. Bîyayîşê cinîyan zaf muhîm o. Ganî seba muzîk û muzîkjenan paştîdayîş bêro dayîş. Ganî hûmara cinîyê ke raşteyan de karê muzîkî kenê zêde bibê.”