HELEB - Ewro Taxa Şêxmeqsûdî yê bajarê Helebî de reya yewine badê şer û pêkewtişanê giranan yê serê taxe de radyo ameye akerdiş. 

 

Radyoyê bi nanameyê Şehba FM Taxê Şêxmeqsûdî de hetê Şerqîya taxe de ame akerdiş. No radyo xeberanê bi ziwanê kurdkî û erebkî do weşan bikero. Frekansê radyoyî 107,5 o. Derheqê radyoyê neweyî de endama radyoyê Şehba FM a beşê kurdî Diyala Ebdîye ajansê ma rê qisey kerd û wina vat: “Na roja yewnine ya akerdişê Radyoya Şehbaye ya. Destpêkerdiş de ma akerdişê radyoyê xo dîyarîya şehîdê bêmergan kenî û dîyarîya keyeyê şehîdan zî kenê.”

 

'Xeberê hîra do bi ziwanê kurdkî û erebkî bêrê weşanayîş' 

 

Diyalaye dewamê qiseykerdişê xo de nê çîyan vat: “Radyoyê Şehba mabene saetanê 8ê sibayî ra heta 8ê şewe weşan keno û bernameyê Rojbaş zî do saet 8ê sibayî de dest pêbikero. Bernameyê Rojbaşî de do rewşa hewayî û sewbîna kilmexeberî bêrî weşanayîş. Heto bîn de xeberê hîrayî zî di bi ziwanê kurdî û erebî bêrî weşanayîş.”

 

'Radyoya ma radyoya vengê şar û azadîye ya' 

 

Diyalaye tewr peynî wina vat: “Ma hewl danî ke demêk vernîya ma de vîşêrê bernameyê Rojbaşî sewbîna derheqê sîyaset, komel, cinî û ciwanan de zî bernameyan virazî û Radyoyê Şehba de biweşênî. Radyoyê ma radyoyê vengê şar û azadîye yo.”