Melîke Aydin

 

ÎZMÎR - Tepişteya nêweşe Muhlîse Karaguzela ke nêweşa şekir, tansîyon, kolestrol, fitqê paştî û milî ya serra 2019î ra nata tepişte ya. Seba dermankerdişê aye demêk asan de bêro kerdiş, aye ardî Zîndanê Tîpê Ryî yê Menemenî yê Îzmîrî la na yew aşme ya ke nêvejenê revîrî.

 

Zîndanan de şert û mercê giranî tesîrêk gird serê tepişteyê nêweşan de virazeno û binpaykerdişê heqan roj bi roje giran bena. Bi taybetî heqê tepişteyê sîyasî yenê astengkerdiş. Rewşa tepişteyê nêweşî her ke şina giran bena û ne dewlet ne zî Dezgehê Tipê Edlî (ATK) na babete de wezîfeyê xo nêanê ca. Nê prosesê peyênî de zabitnameyo ke îmzeya wezîrê edaletî Bekîr Bozdagî tede esta zî bi sernameyê ‘Nêweşîye vera, seqetîyan vera ganî ceza bêra sivikkerdiş ya zî bêra wedaritiş’ 3yê Çeleyê 2023yî de ame weşanayîş. Goreyê zabitnameyo ke şirawitî serdozgerîyan, yeno vatiş ke ganî çarçeweya nuqtaya 104ine ya Qanûnê Bingeyîn de serekkomar eşkeno cezayan şenik bikero ya zî wedarno. No qanûno ke selahîyet dano serekkomar, seba hîzbullah, feto, bazirganê tîryakî ame şuxulnayîş. Zabitname seba tepişteyê sîyasî nîno şuxulnayîş û tepişteyê ke nêweşîya înan giran a yê sîyasî terke mergî yenê kerdiş.

 

Tepişteya nêweşe Muhlîse Karaguzele endamtîya rêxistine ra serra 2019î de ameye tepiştiş. No reya diyîne yo ke yena tepiştiş û xeylê nêweşîyê aye yê kronîkî zî estî. Rewşa Muhlîseye her ke şina giran bena. Verê cû hirê reyan zîndan de krîzê zerrî derbaz kerd, tewr peynî zî seba dermankerdişî berdî zîndanê Tîpê Ryî yê Îzmîrî. La no yew aşme yo ke nîna dermankerdiş. Keyeyê aye dîyar kerd ke Muhlîse ganî bi lez bêra tehlîyekerdiş û dermankerdiş. 

 

‘Goreyê raporê ATKyî se ra 90 nêeşkena tepişte bimana’

 

Muhlîseya 60 serrî Muşî ra ya û serra 2019î de bi îdîayê endamtîya rêxistine Muş de ameye tepiştiş. Muhlîse zîndanê sey Muş û Kayserîye de mend û seba ke bêra dermankerdiş wedarîya zîndanê Tîpê Fyî yê Menemenî. No yew aşme yo ke îzmîr de ya û vera nêweşîyê aye yê giranî ATK her reye raporê eşkena tepişte bimana da. Tewr peynî ATK Kayserî de raporê se ra 90 eşkena tepişte bimana da Muhlîse. 

 

‘Hucreyê yew kesîye de manena’

 

Muhlîseye yew aşme û nîme verê cû merdimanê xo rê vat ke nêweşîyan vera do aye bişirawî zîndanê Tîpê Fyî yê Îzmîrî. Muhlîseye berdî zîndanê Menemenî la no yew aşme yo ke hucreyê yew kesîye de yena tepiştiş. Keye dîyar kerd ke vera hende wextî ke zîndan de ya aye nêbenê revîr û vatî ke aye nêeşkena bi tena serê xo hucre de bimana. Keye da zanayîş ke seba domnayîşê cuya xo ganî tay kesî kişta aye de bî û çim û çaqeyê aye heme masayî. 

 

Keye: Beno ke binpaykerdişî zêde bibê 

 

Muhlîseye dewamê qiseykerdişê xo de vata ke têkoşîn bi weçînayîşan sînordar nîyo û do xover bidî. Keye tewr peynî vat ke ê sey keyeyê tepişteyan bi fikarinî û dîyar kerd ke beno ke binpaykerdişê heqan yê serê tepişteyan hîna zêde bibo.