WAN - Wan de pincarê ke aşmanê biwasî de vejîyenê û seba hamnanî yenê arêdayîş, hem serê sifreyan de hem zî serê tezgehan de cayê xo gênî. Cinîyî tiltilê Wanî ra pincar arê kenî. Cinîyî hem sifreyê xo dewlemend kenî û hem zî şifaya pincaran ra para xo gênî.

 

Wan de ameyîşê wisarî reyde nebatê bi şîfa sifreyan de cayê xo girewt. Nê pincarê ke serê sifreyan de kêm nêbenê serê tezgehan de zî cayê xo girewtî. Pincarê selamask, pirpar, nane, tûzik, tolik, pelhewêz û sewbîna xeylê tewirê bînî eleqeyêk gird vînenê. Cinîyî tiltilê Wanî de seba arêdayîşê pincarî yenê têhet û pîya pincar arê danî. Arêdayîşê pincarî hem bena wesîleya kêfweşîye û hem zî bena çimeyê debarî.

 

 

Seba nebatê bi şifa arê bidî yenê têhet 

 

Şarê herême bi ameyîşê wisarî reyde tiltilê Wanî de seba arêdayîşê pincarî yenê têhet û pîya pincar arê danî. Ma cinîyan ra nebatê tewir bi tewirî yê ke arê danî persa.

 

 

Fêdeyê înan zaf zêde yo

 

Cinîya bi nameyê Hatîce Agişe dîyar kerd ke bi ameyîşê wisarî reyde nebatê bi şîfa zî vejîyayî û vat ke nê nebatî seba weşîya merdiman xeylê baş î. Hatîceye wina vat: “Xeylê tewirê pincarî tîya de resenê. Ma herinda ke keye de ronişî ma yenê tîya. Ma hene mîyanê xozaye de yî û hem zî ma pincaran arê kenî û benê keyeyê xo. Ma seba zimistanî huşk kenî. Tamê înan xeylê weş o.”

 

 

Seba weşîya merdiman baş î

 

Hatîceye her tewirê pincarî de arê daye rêz kerd û vat: “Ma pirpar, nane, gulikî arê danî. Seba weşîya merdiman zaf baş o. Xoza weş a, roje weş a. Kêfê merdiman ano. Her kes yeno, arê beno. Kesê ke seba hewa bigêrî zî yenê. Ma wextê xo tîya de weş derbaz kenî.”

 

 

Nebatê bi şifa 

 

Melek Karişe zî bi domananê xo reyde ameya arêdayîşê pincaran. Meleke fêdeyê pincarê bi şîfa rêz kerd û vat: “ Tûzik zaf bi fêde yo. Seba nêweşîya milî zaf baş o. seba guatirî zaf baş o. Selmask seba raştkerdişê regilî xeylê baş o. Gezgezok seba zerrî û tansîyonî bi fêde yo. Tolik seba made, Pelhewêz seba xeylê nêweşîyan bi fêde yî. Ma bi embazanê xo reyde yenê arêdayîşê pincarî. Ma hem seyran kenî û hem zî pincarê xo arê danî.”