RIHA - Emîne Şenyaşar nobeda edaletî de qisey kerd û dîyar kerd ke heta lajê aye tepişte bêro veradayîş do çalakîya xo dewam bikera û vat: "Êdî bes o wa lajê mi vera bidê. Ma zî şêrê keyeyê xo. Edlîyeyê Rihayî êdî bîyo keyeyê ma."

 

14ê hezîrane serra 2018ine de merdim û pawitoxê Parlamenterê AKPyî yê Rihayî Îbrahîm Halîl Yildizî qezaya Pirsûsê Rihayî de hêrişê keyeyê Şenyaşarî kerd. Hêriş de cinî û di lajê Emîne Şenyaşare ameyî qetilkerdiş. Emîne Şenyaşar û lajê aye Ferît Şenyaşar ke qirkerdiş ra bi birîndar xelisya, 9ê Adara 2021ine de vernîya Edlîyeyê Rihayî dest bi Nobeda Edaletî kerdî. Nobete roja 802ine de dewam kena. Parlamenterê Partîya Çep a Keske yê Rihayî Ferît Şenyaşar seba ke Anqara de bi dayîka Emîne Şenyaşare nobeta edaletî verê Edlîyeyê Rihayî de dewam kerd. Endamê Komeleya Huqûqnasê Seba Azadîye (OHD) yê Rihayî paştdayîş dayî çalakîye. 

 

‘Nê zulmî rê êdî bes o’

 

Emîne Şenyaşare çalakîye de qisey kerd û ard ziwan ke lajê aye 5 serrî yo hucreyê yew kesî de ameyo tepiştiş û wina vat: "Êdî bes o wa lajê mi vera bidê, ma zî şêrê keyeyê xo. Êdî tîya bîyo keyeyê ma. La  La heta lajê mi nêro veradayîş ma do çalakîya xo ya nobeda edaletî dewam bikerê. Ferît do Anqara de ez zî verê berê edliyeyî de roşî.  Tu sûcê lajê mi çin o, êdî bes o wa bêro veradayîş. Xeylêk kesî zî paştdayîşê ma kenê ma zî seba kesê paştdayîşê ma kenê spasdar ê. Ma zaf zulm dî, êdî bes o wa no zulm peynî bibo.”