Melîke Aydin

 

ÎZMÎR - Sevda Turgale ya ke 7 serrî ceza aye rê ameybî birnayîş û cezaya xo temam kerde û ameye tehlîyekerdiş. Sevdaye vat ke heyetê îdareyî yê zîndanan seba vernîgirewtişê tehlîyeyê tepişteyan bi bahaneyê cîyayan demê tehlîyekerdişî derg kenê û vat ke tecrîd her ke şino giran beno, ganî tepişte nêrê vîrîkerdiş.

 

Sevda Turgala ke zîndanê Cinîyan ê Şakranî de ameyîne tepiştiş badê 7 serrî ameye tehlîyekerdiş. Cezaya Sevdaye hema qerarê aye nêameybî girewtiş heme cezayê xo zîndan de temam kerd û dima ra ameye tehlîyekerdiş. Sevdaye bale ant binpaykerdişê heqan ser û da zanayîş ke ganî tepişteyî tena nêrê verdayîş.

 

Sevdaye Erzirom de wexto ke wendekara unîversîteya Ataturkî bî bi îdîayê ‘endamtîya rêxistine’ derheqê aye de dewa ameye akerdiş. Netîceyê dewaye de ceza Sevdaye rê ameye birnayîş û ameye tepiştiş. Avukatan dewa berdî dagerîye. No proseso ke hema dewa dewam kerdêne de Sevdaye rê cezaya ameye birnayîş û cezaya ke ameye birnayîş zîndan de temam kerd.

 

‘Sey mehkema ya la mercîyê pawatişî çin o’

 

Sevdaye bale ant serê Heyetê Îdarî yê Zîndanan ke çeleyê 2020î de kewto dewre û wina vat: “Nimune ez vaja, bi bahaneya ‘ti awe zêde şuxulnena’, ‘kêm kitaban wazena’, ‘ti komelî rê hadre nîya’ tepişteyan vejenê heyetî. Mudir, dozger, teknisyen, kesê ke tamîratê muslixan kenê, derheqê ma de benê wayîrê heqî. Psîkologî estê, komelnas estê. Wexto ke newe vejîya ma nêzanayêne senîn o. Çend embazê ma vejîyayî. Sey mehkemayêke esta la mercîyê pawitişî çin o. Tîya de mercîyê îdareyî esto. Vanê ke komelî rê hadre nîya. Babetêka bi munaqaşayin a.”

 

‘Poşmanî yena ferzkerdiş’ 

 

Sevdaye da zanayîş ke yê ewil vejîyayî heyet tehlîyeyê înan taloq kerdê û wina domna: “Ez zî nê tepişteyan ra yew a. Dima ra reyna vetî heyet. Tepişteyê ke cezaya înan qedîyena vejenê nê heyetî vernî. No merdiman aciz keno. Merdim hende wext bêbahane tepişte maneno, derheqê cuya merdimi de mekanîzmayê qerarî yenê awankerdiş. Mi nêwaşt nê stresî biciwîya. Poşmanîya çi, ceza qedîyaya. 8 aşman cezaya mi derg kerdî. Tepişte nê heyetî vera xeylê probleman ciwîyenê.”

 

‘Vejîyayîşê heyetî red kerd’

 

Sevdaye da zanayîş ke verê tehlîyebîyayîşî bi psikolog reyde pêvînayîş yeno kerdiş û persê sey ‘ti teber de do se bikera, bi keyeyê xo reyde manena ya nê’ yenê persayîş. Sevdaye wina dewam kerd: “Merdimê ke 30 serrî tepişte mendî estê. Ez 7 serran menda. 7 serrî de zaf çî bedilîyayo. Ez nêzana se bikera, no çîyêk sey 5 deqayan nîyo ke bêro dîyarkerdiş. Pêvînayîşê ma yê psîkologî reyde wina bî. Bi israr vatî biveje heyetî. La ez nêvejîyaya. Ez 8 aşman zêde tepişte menda.”

 

‘Tecrîdo giran dewam keno’ 

 

Sevda dewam de nê çî vat: “6ê teşrîna verêne 2021ê de operasyon zîndanan rê ame kerdiş. Gardîyan û cendermeyî kewtî koxuşan. Ma koxuşan ra ameyî vetiş û ma kerdî koxuşê bînan. Dima ra 50 tepişteyî yew koxuşêke de mendî. Seba şertê weşîye mîyan de koxuşa FETOjîyan bî ma kerdî koxuşan. Ez demêk vejîyaya turnuvayê voleybolî. Emser dest pêkerd. Ma embazanê xo wina dî. Koxuşa ez ci de mendêne 14 kesî bî. Yê newe ameyîne estbî. Pandemî tecrîd awan kerd û dima ra tecrîd dewam kerd. Kitaban bi hûmare dayîne. Kovarê ke teber ra ameyîne nêdayîne.”

 

‘Heyet seba kesê demêk derg o tepişteyê do bibo problem’

 

Sevda wina qedêna: “Zîndanan de tecrîdêk giran esto. Tepişteyê ke demêk derg o tepişteyê problemê înan yê weşîye yê cidî estê. Rîsko ke nêweşîyê bînî vejîyê esto. Seba embazê demêk derg o tepişteyê, heyet beno problemêk pîl. Embazêka ma esta do aşma temmuze de bêra veradayîş. La zelalî çin o. Beno ke derg bikerê. Beno ke tahlîye nêkerê. Ez venga hîsgêrî pêro keye û şarî kena ke derheqê rewşa tepişteyan de bêveng nêmanê û tepişteyan tena nêverdê.”