MERKEZÊ XEBERAN - Endama Konseya Hemserekîya PYDyî Foza Yûsif da zanayîş ke problemê bingehîn ê Sûrîye, netewe dewlet û nêbîyayîşê sîstemê demokratîke yo û vat: "Modelê yewine yê pêro şarê Sûrîye rê bibo cewab zî Îdareyo Xoser o.”

 

Averşîyayîşê sîyasî yê Sûriye û Vakur û Rojhelatê Sûrîye dewam kenê. Pêwa hêrişê hemverê Vakur û Rojhelatê Sûrîye munaqeşeyê derheqê çareserîya alozîyan zî dewam kena. Endama Konseya Hemserekîya PYDyî Foza Yûsif derheqê krîzê Sûrîye, rewşa Îdareyê Xoserî de cewab da persanê ANFyî.

 

‘Nêbîyayîşê sîstemêk demokratîk problem o’

 

Foza destpêkê qiseykerdişê xo de wina bale ant serê bingehê krîzê Sûrîye û wina vat: “Rewşa ke tira meseleya Sûrîye vajîyena, meseleya pêro dewletanê herêm a. Sûrîye seba ke dewleta neteweyîye bîya krîzî de têrî bîya û parçe bîya. Sûrîye şarê xo yê bînî kurdî, sûryanî înkar kerdî. Naye ra meseleyê sîyasî û bawerî qewimîyayî. 2011 de vera nê sîstemê netewa dewlete acizîyêka pîle qewimîyaye. Coka meseleya bingeyî ya Sûrîye netewa dewlete û nêbîyayîşê sîstemêkê demokratîkî yo.

 

‘Şaran serra 2011 de sere wedarna’

 

Foza Yûsif da zanayîş ke vernîya serra 2011ine zî problemî estbî û wina dewam kerd: “2011 ra verî zî sey sîyasetê nîjadperestî yê vera Rojawanê Kurdîstanî, sîyasetê mezhebî û dînî û sîyasetê netewa dewlete meseleyî est bîyî. Dima ke Wisarê Ereban dest pêkerd netewa dewlete ya Sûrîye zî îflas kerd. 2011 de Deraa de serewedaritişê verênî qewimîyayî. Çunke şar hînî aciz bibi, waştişê şarî zaf bîyî. Şarî dîyalogî, têdûştî, edalet, azadîye waştêne. Kurdan waştêne ke nasnameyê înan nêro înkarkerdene. Ereban demokrasî, ekonomîya rinde waştêne. Yanî şarî vurîyayîş waştêne. 12 serran de krîzî bîyî sebebê dej û xerakerdişî; bi mîlyonan merdiman koç kerd, bi se hezaran merdimî kişîyayî û birîndar bîyî. Binawanîya Sûrîye îmha bîye. Şerê vera DAÎŞî zî zaf tesîrê xirabî kerd. Xizanîye zêdîyaye. 12 serrî yo şarê Sûrîye nê meseleyan de têrî yê û nê meseleyî vera pîlêr benê.”

 

‘Îdareyê Xoserî timî xîretê çareserî kerd’

 

Foza dîyar kerd ke Îdareyê Xoserî timî seba çareserî xîret kerdo û vat: “Seba ke hukmatê Sûrîye vera şarî şîdet şuxilna mudaxeleya teberî qewimîyaye. Hêzanê teberî goreyê menfaetanê xo mudaxele kerd. Tirkîya  bi destê Cebhet El Nûsra û cerganê bînan mudaxele kerd. DAÎŞî ra dima hêzanê Koalîsyonî mudaxele kerd, 2015 ra dima Rûsya mudaxe kerd. Yanî 2015 ra dima meseleya Sûrîye hînî bîye meseleya globale. Sebebê pîlbîyayîşê meseleya Sûrîye hukmatê Şamî û hêzê mîyanneteweyî yê. Îdareyê Xoserî tim seba çareserkerdişê mesele xîret kerd la çewî qîmet nêda ney. Îdareyo Xoser daxîlê platformanê mîyanneteweyîyan nêame kerdene. Coka seba çareserîye îrade û hêzê Sûrîye zî nêvejîyayî werte. Hêzanê mîyanneteweyîyan zî seba menfaetanê xo qetî nêwaşt mesele û krîzê Sûrîye çareser bikerê. Coka pêvînayîşanê Cenevre, Astane, Soçî ûsn de çareserîyêke pêşkêş nêbîye.”

 

‘Modelo sereyîn Îdareyê Xoserî yo’

 

Endama Konseyê Hemsereka PYDyî Foza Yûsif, peynîya qiaeykerdişê xo de wina bale ant serê rol û mîsyonê Îdarîyê Xoser û vat: “Îdareyê Xoserî înîsîyatîfê çareserîye aver berd. Se ra 30ê şarê Sûrîye ewro binê sîwana Îdareyê Xoserî de yê. Îdareyo Xoser wayîrê înîsîyatîfê çareserîye, îradeyê sîyasî û leşkerî yo. Îdareyo Xoser çareserîya mesele de tim îradeyê şarî rê giranîye dano. Îdareyê Xoserî modelê xo yê îdareyî vet werte la no îdare ame peygoşkerdene. Heta ke Îdareyo Xoser tede çin bo qet yew mesele çareser nêbena. Adresê çareserîye Îdareyo Xoser o. Modelê Îdareyê Xoserî ra ber modelêk çin o ke cewab bido waştişanê şarê Sûrîye.”