MERKEZÊ XEBERAN - Festîvala Cinîye ya Zîlane ke kombîyayîşê tewr gird yê cinîyanê kurdan ê Almanya yo, emserr do reya 17ine bêra viraştiş.

 

Goreyê xebera ANFyî do Festîvala Cinîye ya Zîlane ya 17ine do bajarê Gelsenkîrchenî yê Almanya de bêra viraştiş.

 

Festîvala ke hetê Yewîya Cinîyan ê Kurd ê Almanyaye (YJK-E) ra yena organîzekerdiş, do seba vîrardişê Evîn Goyî (Emîne Kara) pê bêra ke 23ê Kanûne de paytextê Fransa Parîsî de qetlîyamêk de ameybî qetilkerdiş. Festîvale de do cuye û têkoşînê Evîn Goyîye bi dîmenan bêra vatiş. 

 

Sewbîna serê felsefeya 'Jin, Jiyan, Azadî' de do panel bêro viraştiş. Berardişê destan ê cinîyan zî do bi standan bêrî mojnayîş. Fotogragsazê cinî zî do beradişanê xo yê destan yê têkoşînê azadîye ya cinîye bi pêramotişî de bimojnî.

 

Festivale de seba tutan zî cayê kayî ameyo amadekerdiş.

 

Kişta komê govendî de do hunermend û komê muzîkî yê Cinî Ma, Mizgîn Tahir, Kevana Zêrîn, Eylem Aktaş, Beser Şahîn û Fîrmeske zî serê sahneye de hunerê xo bimojnê.

 

Komîteya Amadekare ya Festîvale ra endamê Têgêrayîşê Cinîyê Kurd ê Ewropaye (TJK-E) Jînda Denîz û Ayten Kaplane derheqê amadekarîyê xo de malumat da û venga tewrbîyayîşî kerd. 

 

Têkoşînê vera zihnîyetê camêrdî 

 

Jînda Denîze bale ant hetê mîyanneteweyî yê Festîvala Cinîye ya Zîlane ser û venga tewrbîyayîşî kerd heme cinîyê ke netewanê cîyayan ra yê. Jînda Denîze ard ziwan ke amadekarîya festivale verê qedîyayîşî de yo û dîyar kerd ke amacê festivale mojnayîşê hêzê cinîye yo û wina dewam kerd: “Azadîya cinîye û şorişê cinîye do bi serkêşîya 'Jin, Jiyan, Azadî' pê bêro. Coka ra festîvale hem do biba mesajêk hem zî do biba vengêk. Do hem mesaj bida dinya û hem zî bida zîhnîyetê camêrdî. Cinî çend yew bibî û pêser bibê, hende xo bi rêxistin bikerê. Çend zêde bibê do hende zî xurt bibê, îşxalkerdiş zî do hende zeyîf biba. Coka ra ganî her kes tewrê festivale bibo, ma zêde bibî ke îşxalkerî, zihnîyetê camêrd û mezgê camêrdî werizê."

 

'Ma têkoşînê cinîyan berz kerd’

 

Ayten Kaplane zî vat, "Ma prosesêk giran pey xo de verda. Bi xususî prosesêk şîdet û qirkerdişê hemverê cinî bî. Rojhelat de qetilkerdişê Jîna Emînî, qirkerdişê dîyîn ê Parîsî, erdlerzî tesîrêk giran cinîyan rê kerd. Pêwa pêro nê çîyan ma têkoşînê cinîyan berz kerd.  Bi xususî bi xoverdayîşê cinîyan ê Rojhelat reyde felsefeyê ma yê xoverdayîşê cinî yê 'Jin, Jiyan, Azadî' gerdûnî bî. Xoverdayîşê Kobanî cinîyanê kurdan dinya de da naskerdiş, bi xoverdayîşê cinî yê Rojhelat reyde xoverdayîşê ma gerdûnî bî. Bi Festîvala Cinîyan ê  Zîlane ya emsarî de ma rêxistinbîyayîşê xo, têkoşînê xo, sewbîna pêro tevgerê cinîyan hêzê xo yê  yewbîyaye û amancê xo yê hemparîya têkoşînî bi dinya bidê naskerdiş. Na festîvale de ma do bi kom û derûdorê cîya yê cinîyan reyde kom bibi. Ma do  têkoşînê xo yê hempar, felsefeyê xo yê 'Jin, Jiyan, Azadî' munaqeşe bikerê."